شعر ترکی

گئدیرم

 

ایکی اوزلر دولاشیر

دوست یا دوشمان...،آدام فیکری چاشیـر

گـئـدیـرم ، کـسمـه یـولــوم ، یــوخ مـنـه اومّیـد دایـانام

بیر نفس زیندانا دوشموش، بو قفس دن  نـه چیخیـر جان، نـه یاشیـر

نـئـجـه  خـنـجــر  ویـرانیـن  اللریـنـــه  مــن گـووَنـیــم؟

غـم دولور ســینه ده حسـرت له آشـیـر

منه  گئتمک  یاراشیر

.

اوره گیم قان، گئدیرم

کوسـموشم  اهـل ریـادان ، گـئـدیـرم

تبــــریزیم، ساخلاماسـان، زلزله تک تیتـره ر  ایـچـیـم

عـیـنـالــی قـدّیـمـی سـیـنــدیـردی فلک، تـوپـراغـا قـوربـان گـئدیـرم

دویموشام  رنگ و ریادان، دِئ گوروم  چاره  نـه دیــر؟

گـوزو آغلار،یاشـی پـنـهان، گـئـدیرم

دئمه آسـان گئدیرم!

 

امیر علی مطلوبی

 

 

من همن بولوتام

 

یئر- گؤی سئوگیسی دیر بیزیم سئوگیمیز

نئجه بولوت یاغار قارا توپراغا!

قارا یئرده نه وار؟ هئچ بیر شئی، بولوت

ایستکسیز باشلایار یئره یاغماغا

من همن بولوتام، سنسه قارا یئر

نه سنده سئوگی وار، نه منده ایستک

سانما سئودالینام یاغیرام سنه!

یالنیز چون بولوتام یاغماغیم گره ک

 

داملا

 

 
 

بیلمه دین

 

آغلادیم گوزیاشیمی گیزلینجه سیلدیم  بیلمه دین

دردین آلدیم جانیما     اولدوم-دیریلدیم  بیلمه دین

سن منیمله اوزگه لشدین یاندیریب  یاخدین منی

من سنی ملک دلین سولطانی بیلدیم  بیلمه دین

سروتک آزادایدیم        طوفان اگنمزدی     باشیم

قددیمی ائتدین کامان  یای تک اگیلدیم بیلمه دین 

عشق سرداری کیمی قورخمازدیم هئچ بیر کیمسه دن

بیرسنه بیر عشقینه  آنجاق  یئنیلدیم  بیلمه دین

داش دا اولسام    اول  آیاقلار آلتینا  تورپاق اولوب

بیر قوزو قوربان کیمی واللاه سریلدیم  بیلمه دین

یوسیفی آغلار قویوب  گوزیاشینا  هئچ باخمادین

اوچدوم آخیر قوش کیمی گوزدن ایتیلدیم بیلمه دین

 

یوسف اعظمی

 

 

 قفس

 

آرزیلار هئی منی سسلر

داغیـدار سینـمی او غملی نفسلر

عؤمور حسرتله ساووشدو سؤزلر حبس اولدو قفسده

شاعیرین طبعی دیر عالملری بسلر

داریـخیب داغـلی قفسلر

 

کریم حیدر زاده (سالک)

 

 

 

گؤزللیکدن یازین گئتسین

سؤز اینجی سین کاغیذلارا دوزون گئتسین

سایقیسیزلیق دوستا کی هئچ دوشمانا دا یاخشی دئییل

موشگوللری  منطق ایله  چؤزون  گئتسین

کؤتولویو  پوزون گئتسین

 

اکبر حمیدی علیـار

 

 

 

اوشاق شعری

 

سلام گونش چیچک

گونش چیخدی داغ اوسته - ایشق ساچدی باغ اوسته

گونش اوزو گولردی - اوز گوزونو سیلردی

ساچاخ سالار هر یانا - گول چیچکلر اویانا

چیچک آییلدی باخدی  - اوز گوزون سیلدی یاخدی

چیچک دئدی آی ایشیق - باغا وئرک یاراشیق

گونش دئدی بیرلشک - بولوت دا ووُرسون شیمشک

یاغیش یاغسین بو باغا - گوی چمنه اوتلاغا

وئرک گوزللیک شنلیک - وئرک باغا یئتگین لیک