اینسانین عومرونه  مات قالمیشام من

اینسانین عومرونه  مات قالمیشام من 

لذذتین  دادمامیش کؤچور   دونیادان 

إله  کی  ایسته ییر  کامینا          چاتا 

عزرائیل   گوتورور  اوچور    دونیادان

*****

ازئل    جان   آلاندا   آنا       قارنیندا

یازیلیر       طالعین   بختین   آرنیندا

وئریلسه    قسمتین   دونیا    واریندا

قسمت سندن قاباق  قاچیر دونیادان

*****

بیلمه دن  اوشاقلیق  سؤوشور  بیرآن

جاوانلیق     اَییامی   قؤوشور   بیرآن

بیر قیز بیر اوغلانلا   یؤوشور   بیرآن

اینسانا   یئنی  نسل   آچیر   دونیادان

*****

دؤره نی       بالالار  چوخ تز   آلیرلار

هَره سی   بیر  هاوا  بیر ساز چالیرلار

ائولئنجک   گئدیرلر   آیری     قالیرلار

نسیل لر  گؤر  نه تز  کئچیر  دونیادان

*****

نئوه         نتیجه لر    آلیر       دؤرونو

هَر بیری  بیر یاندان   دئلیر      بؤرونو

فلک   بو     دونیادا    وئریر    جؤرونو

سئودیگین کَس لری   سئچیر  دونیادان

*****

غم    کئدر   اَلیندَن   واقت اؤلمور کئفه

اؤلوم      قاپیمیزی   چالیر   یوز   دئفه 

دوزولور    دالبادال    هر اینسان  صئفه

اجئلین      شربتین    ایچیر    دونیادان

*****

قوجالیق  اوز  وئریر گؤز یاشلان دؤلور 

عومرون گولون فلک  کؤکوندَن    یؤلور 

«آمانسیز»ین    گولو  گؤر نه تِز  سؤلور 

باغبان سؤلموش گولو  بیچیر  دونیادان