امامزادا موسی الجمال تبریزین گؤزل مکانلاریندان بیرینه چئوریلیر

تبریز شهرداری امامزادا سید جمالین تبریزین گؤزل مکانلاریندان بیرنه چئوریلمه‌سیندن خبر وئردی. تبریز شهرداریسی‌نین عمومی رابطه‌لری‌نین وئردیگی خبره گؤره، صادق نجفی تبریزین راستا کوچه محله‌سینده امامزادا ابوالحسن موسی الجمالین احیا و توسعه پروژه‌سیندن گؤروشده دئدی: دین بؤیوکلری و مجتهدلرین تأییدینه گؤره بو کرامتلی امامزادا‌نین نسبتی دؤرد نسل ایله امام موسی بن جعفره (ع) یئتیشیر. ائله بو سابقه، بو مکانین تبریزین تاریخی، مذهبی و گزمه‌لی یئرلریندن بیرینه چئوریلمه‌سینی واجب ائلیر.

تبریز شهرداری آرتیردی: بو مکانا کئچمیشده لازمینجه دقّت اولونماییب آما ایندی شهرداری و شهر شوراسی‌نین تعاملی ایله اونون احیا و توسعه‌سی سرعتله قاباغا گئدیر.

نجفی آرتیردی: تقریباً سککیز آی بوندا اوّل بو مکاندان گؤروش ضمنینده بو امامزادا‌نین احیاسینا قرار آلیندی و نظره گلیر یاخین گله‌جکده بورا تبریزین گؤزل یئرلریندن بیرینه چئوریله.

او، ایندیکی نسلین تبریزین کئچمیش افتخارلاری‌ ایله تانیش اولماسی‌نین ضرورتینه تأکید ائله‌ییب دئدی: بیزیم بو طرحلرین اجراسیندان اساس هدفیمیز ایندیکی نسلی اسلامین افتخارلی تاریخی ایله تانیش ائله‌مکدیر. چونکی کئچمیش همیشه گله‌جگین چیراغی اولوب و کئچمیشی تانیماق قاباغا گئتمگه انگیزه یارادار.

نجفی، هابئه تبریز بازار محدوده‌سینده اجرا حالیندا اولان پروژه‌لره اشاره ائدیب دئدی: صادقیه‌نین احیاسی، راستا کوچه‌نین فلسطین خیابانینا متصل اولماسی طرحلری‌ده اجرا حالیندادیر کی بو گؤزل‌لندیرمه طرحلری ایله تبریزین تاریخی بازار منطقه‌سینی اؤزونه یاراشان رونقینه قاییتما‌سینا اومودوموز وار.

امامزادا موسی‌الجمال، امام موسی کاظمین (ع) نوه‌لریندندیر کی نَسَبی دؤرد نسل ایله او حضرته یئتیشیر.

بو امامزادا ابن‌اعرابی و صاحب طوق و صاحب حاجات آدینا دا تانینیر.