شعر

 

بؤیوک بیر دییارام ، بؤیوک بیر توپراغام

واحید بیر میللتم ، واحید بیر بایراغام

اؤزبکم ، قیرقیزام ، تورکم ، قافقازام

قارداش وای ، سویداش وای ، ائلیم اوبام وای

وطندن وطنه گئدن یولوم وای ......

 

تبریزم ، دربندم ، آنکارایام من

کاشغرم ، کرکوکام ، گؤر هارایام من

ایکی یه بؤلونموش آستارایام من

آراز وای ، مفتیل وای ، سرحد تئلیم وای

وطندن وطنه گئدن یولوم وای ......

 

هر یانا اوز توتسان من اویاندایام

زنگاندا ، موغاندا ، نخجوان دایام

تورکمن چایدایام ، گولوستان دایام

قلم وای ، ایمضا وای ، ساختا قولوم وای

وطندن وطنه گئدن یولوم وای ......

 

موشفقم ، جاویدم ، گول له لنمیشم

هئیکله دؤنموشم ، داشا دؤنموشم

اؤلویم ، ناحاقدان بئله سینمیشام

گول له وای ، اعدام وای ، ناحاق اؤلوم وای

وطندن وطنه گئدن یولوم وای ......

 

بیر یاندا بایراغیم یاساق اولوندو

بیر یاندا چکیج له اوراق اولوندو

من تورکم دییه نلر دوستاق اولوندو

یاساق وای ، کسیک دیلیم وای

وطندن وطنه گئدن یولوم وای ......

 

بابکم ، نبی یم ، لاپ دده قورقودام من

سازام سؤزم من

کول آلتیندا دالی یانار کؤزم من

آلوو وای ، آتش وای ، سؤنموش کولوم وای

وطندن وطنه گئدن یولوم وای ......

 

هر یئرده ، هر یاندا بیر بارماغیم وار

شرقیدن – قربه  دک  باخ دایاغیم وار

سازلی بورچالیم وار ، قاراباغیم وار

باغیم وای ، باغچام وای ، سولموش گولوم وای

وطندن وطنه گئدن یولوم وای ......

 

بیر داها کیمسه یه آللانماز ائلیم

نه روسا ، نه فارسا اییلمز بئلیم

زنجیره چکیلمز ، یاغلانماز قولوم

قیریلمیش زنجیر وای ، آچیق قولوم وای

وطندن وطنه گئدن یولوم وای ......