سنه اؤپوشمه یی من اؤیرتمیشم

آلئکساندر قریبویئدوو‌ون قادینینا مکتوبو

آلئکساندر سئرگئیئویچ قریبویئدوو* روس شاعیری، یازیچی، دیپلوماتی. 1795-جی ایل یانوارین[ژانویه‌نین] 4-ده موسکوادا، ظابط[افسر] عائله‌سینده دونیایا گلیب.

تحصیل آلدیغی مدتده فرانسیز، اینگیلیس، ایتالیان، آلمان، داها سونرا یونان، لاتین، فارس، عرب و تورک دیل‌لرینه یییه‌له‌نیب [صاحب اولوب].

1827-جی ایلده تورکییه ایله ایران آراسیندا دانیشیق‌لاردا واسیطه‌چی کیمی چیخیش ائدیب. قریبویئدوو 1828-جی ایلده ایرانلا ایمضا‌لانان تورکمنچای موقاویله‌سی‌نین حاضیرلانماسیندا ایشتیراک ائدیب.

بوندان سونرا ایراندا رسمی سفیر تعیین ائدیلن قریبویئدوو ائله یئرلی ساکین‌لرین سفیرلییه هوجومو زامانی آمان‌سیزجا قتله یئتیریلیر. جنازه‌سی تیفلیسه آپاریلان قریبویئدوو بورادا مقدس داوید کیلسه‌سینده دفن اولونور.

آشاغیدا گلن مکتوبو، قریبویئدوو اؤلومون‌دن 45 گون اول ایرانین قزوین شهرین‌دن حیات یولداشینا یازدیغی مکتوبو تقدیم ائدیر.

قزوین ، دئکابیرین 14 –و ، میلاد آخشامی ، 1828-جی ایل .

مکتوب:

جان – جییر! صاباح تئهرانا یولا دوشوروک، آتلا اورایا دؤرد گونلوک یول‌دور. دونن بیر طلبه‌میزله سنه مکتوب گؤندرمک ایسته‌دیم ، لاکین فیکیرلشدیم کی، او، اون ایکی گون‌دن تئز گلیب چیخمایا‌جاق. م – مئ ماجدونالد دا، سن ده ظرفی[پاکئتی] عینی واختدا آلاجاقسینیز . منیم میثلی – برابری اولمایان دوستوم، سنه یازیغیم گلیر، سن‌سیز حالیم یامان پریشاندی.

ایندی من اصل معنادا باشا دوشورم کی، سئومک نه دئمک‌دیر. اول‌لر ده مؤحکم باغلاندیغیم آدام‌لاردان آیری دوشمه‌ییمه کدرلنیردیم[غم‌لنیردیم]، آنجاق بیر گون، ایکی گون، بیر هفته کئچن‌دن سونرا کدریم یوخا چیخیردی، ایندی ایسه سن‌دن اوزاقلاشدیقجا حالیم خاراب اولور. مله‌ییم منیم، آللها دوعا - سنه ائله‌یک کی، بوندان سونرا بیزی بیر ده آیری سالماسین .

بورادا اسیرلر منی دلی ائله‌ییب‌لر. بعضی‌لرینی گئری وئرمیرلر، بیر باشقا‌لاری ایسه اؤزلری قاییتماق ایسته‌میرلر. اونلارین اوزوندن، بورادا هدر واخت ایتیردیم، تامامیله هدر .

قالدیغیمیز ائوه سؤز اولا بیلمز ، سوبا [بوخاری] اولمادیغینا گؤره سویوق‌دور ، مانقال‌لارین ایگین‌دن[قوخوسوندان] ایسه باشیمیز شیشیب .

دونن بورا‌داکی وزیر میرزه حبی منی قوناق چاغیرمیشدی، قارداشی یئرلی شاه‌زاده‌نین باجی‌سینی آلیر و توی – بوسات[شکوه و جلال] اون‌دؤرد گون‌دور کی ، داوام ائدیر؛ بؤیوک حه‌یط‌ده‌کی بیر نئچه اوتاقدا یئمک - ایچمک، چه‌رز[دئسئر] قویولوب، شام یئمه‌یی وئریلیر، بوتون حه‌یط گئنیش کتان اؤرتوکله اؤرتولوب، چادیرا بنزه‌ییر، گئن - بول ایشیقلاندیریلیب ، اورتادا مئیدان آچیلیب، سنینله تبریزده گؤردوگوموز موختلیف تاماشا‌لار گؤستریلیر، بئش‌یوز نفردک قوناق چاغیریلیب، منیمله گؤروشمه‌یه گلن تزه‌بی[təzəbəy] زر – زیبا ایچینده ایدی.

نه سن شاه‌زاده قیزیسان، نه ده من مشهور آدام، آما بونا باخمایا‌راق بیزیم تویوموز داها شن کئچدی. ایلک دفعه سنی اؤپدوگوم یادیندادیرمی؟ ائله اوندان سونرا تئزلیکله بیز عؤمورلوک عهد – پئیمان[ایلقار] باغلادیق . بس بیرینجی آخشام نئجه، یادیندامی؟ آنان، ننه‌ن و پراسکوویا نیکولایئونا ائیواندا اوتورموشدولار، بیز ایسه اوتاقدا، پنجره‌دن خئیلی[قابل توجه] اوزاق؛ سنی اؤزومه سیخاندا، جان – جییر، یامان قیزاردین، من سنه مؤحکم – مؤحکم اؤپوشمه‌یی اؤیردیردیم. من خسته‌له‌نیب دوشرگه‌دن[خیمه‌گاه/کمپ/اردوگاه] گئری[دالی] قاییتدیق‌دان سونرا ایسه سن یانیما گلیردین. عزیزیم!...

نه واخت سنین یانینا قاییداجاغام؟ بیلیرسنمی، سن‌دن اؤترو یامان راحاتسیزام، هئی منه ائله گلیر کی، سفریم عرفه‌سینده[آستانه‌سینده] باشینا گلن حادثه یئنه تئکرار اولونا‌جاق. بیرجه اومیدیم دره‌جانا‌دیر؛ او، گازدان آییق یاتیر و همیشه سنین یانیندا اولور. عزیزیم، اونو اؤپ، فیلیپپه و زاخارییه دئ کی، مکتوبوندا خبر وئردیک‌لرینه گؤره اونلارا تشککور ائدیرم. اگر سن اونلاردان راضی قالسان، منده اونلاری راضی سالا بیلرم .

بیر آز اوول شهره گزمه‌یه چیخمیشدیم؛ زنگین مسجیدلر، بازار، کاروانسارا خارابازارلیق تأثیری باغیشلادی. چوخ گومان کی، بیز گلن ایل بو یئرلره سنینله بیرلیکده گلجه‌ییک و یقین اوندا هر شئی گؤزونه یاخشی گؤرکمده[ظاهرده] دیه‌جک .

خوداحافیظ نیناجان، مله‌ییم منیم! ایندی آخشام ساعت 9-دور، یقین بیلیرم کی، سن ایندی یاتماق اوچون یورغان-دؤشه‌یه گیریرسن، من ایسه بئشینجی گئجه‌دیر کی، چیمیر ائلمیرم. حکیم[دوکتور] دئییر کی، قهوه‌دن‌دیر. منسه فیکیرله‌شیرم کی، سببی باشقا‌دیر. ماغار قورولموش حه‌یط یاتاق اوتاغی‌نین یاخینلیغیندا‌دیر، جاماعات اوخویور، شنله‌نیر، بو نه‌اینکی منی بئزدیریر، عکسینه، یئرینه دوشوب، هئچ اولمازسا، اؤزومو تنها حس ائتمیرم. بیر داها خوداحافیظ، آغالی‌به‌یه، مونتیسه و باشقا‌لارینا سلامیمی چاتدیر، دوداقلاریندان‌، اللرین‌دن، آیاقلاریندان‌، بیر سؤزله، باشیندان آیاغیناجان اؤپورم .

همیشه سنین حالی پریشانین آ . قر .

پ.س. صاباح میلاد بایرامی‌دیر؛ سنی تبریک ائدیرم، عزیزیم، جان – جییریم. گوناهکارام کی، (جیسمن گوناهکارام) سن بو بؤیوک بایرامی بئله ماراقسیز کئچیردیرسن، تیفلیسده سنین گونون خوش کئچردی. خوداحافیظ، سنه چوخ‌لو-چوخ‌لو سلام

حاضیرلایان:‌ حسین واحدی

http://huseynvahedi.mihanblog.com/post/472