...سنه وطن

ایللر اؤنجه تاراس بولبا رومانیندا اوخودوغو بیر دیالوقو خاطیرلادی.او دیالوق دا تاراس بولبا اوغلو ایله بیر یئرده دوروب و یاشلی گؤزلری ایله وطني اولان ایستئپه(بوزقیرا)باخیب وسؤیله دی:

"لعنت سنه ایستئپ سن نه قدر گؤزلسن "

او رومانی اوخویاندا بلکه 15 یا دا 16 یاشی وارایدی.وندنسه بو گؤرونتونو اؤزخیالیندا جانلاندیرا بیلمیردی.نه ایسه وطن سئوگیسی گرکدیر سؤزونون معنا سینی آنلاییرسادا آما او سؤزو جانلاندیریب اؤزو آتوشگه نین (پنجره نین ) بوتاییندا دوروب و آتوشگه نین اوتاییندا ، یازارین الیله یارانان گؤزل منظره یه باخا بیلمیردی.

ایندیسه ،هارداسا 42 یاشی وار و ساوالانین اته یینده دوروب و اورداکی گؤزه للیکلره باخیب ودئییردی"سن نه قدر گؤزلسن".اوجا داغلارلا دانیشیب ،گؤز ایشله دیکجه دالغالانان زمیلره وتارلالارا دوموخوب واونلارلا دردلشیردی.

نئچه ايللر اؤنجه يه  قاییتدی.خاطیره لر ،گؤزونون اؤنونده جانلانیب واو بیرگونو دوشوندو .او گون ......

هارداسا 15 ايل قاباق ايدي.اوگون بیر داها اوتوروب ،بورکونو قاباغینا قویوب دوشوندو.چالیشدیغی یئرین دورومو هئج یاخشی دئییلدی. نه اومیدلرله اوفابریکایا گلیب ایشه باشلامیشدی آخي، بير بيلسه يدينيز.او ایلک گونلرده ایشلر چوخ آغیر اولسادا او ایشلرین بیر موهندیسه چکیجی اولدوغو اوچون وتام تئکنیکال بیر ایشده ایشتیراک ائتمک ایسته یین بیر هوسکارا یئترینجه اویغون اولدوغو اوچون،او آغیرلیقلاری دوشونوب و سایمیردی.نه ایسه ائله اورادا بوتون اوخودوغو درسلرین و او کیتابلاردا یازیلان قونو(مووضوعلارین ) نئجه حیاتا کئچیب و دوغرولماسینا تانیق (شاهید) اولوردو.بیر جاندان کئچمیش عسگر کیمی هئچ نه ایی دوشونمه دن ،چتینلیکلری،یورغونلوقلاری و ائله جه ده آز گلیری دوشونمه دن بئله ،یالنیز و یالنیز ایشله ییردی.ایشین دن ذؤوق آلماق بیر یانا ان بؤیوک ندنی اؤزشهرینده واؤز یئرلرینده قالارغی اولماغی واؤز یاشادیغی یئر لرده بیر یارارلی ایش گؤردوگو ایدی.اما بودیقه او قدر زحمتلرین سونو ،داوام سیز و بللی اولمایان ایش دورومو ایدی.ائله سون واخت لاردادا باشقا بیر ایش آراماغا باشلامیش ایدی و نه یازیق کی اؤز شهرینده او سایاقدا ایش اولمادیغینا گؤره باشقا شهر لر،او جومله دن تهرانا گئتمک گره یینده قالمیشدی.بلکه ده سوبای اولسایدی هئچ بو قدر دؤشونمه یه مجبور اولمازدی آما اورتاق بیر حیات قوردوغو اوچون دوشوندوروجو بیر دوروما دوشموش ایدی.بیر یاندان دا دوستلاری نین و صینیف داشلاری نین سؤزلری یادینا دوشوردو .نه ایسه اوزامانلار اؤز شهرینده ایشله دیگینه گؤره اونا بئله دئییر دیلر."آخیر نییه اورادا قالمیسان .اوردا ایشله مکدن، فاطی یا تومان چیخماز

ایره لیله مه گه هئچ ایمکان یوخدورکی اورادا .

بیرینجی اولاراق اورادا آیلیق لار آشاغی دیر.ایکینجیسی ایسه بودور کی صنعت و ایش باخیمیندان گئنیش بیر آلان یوخدور ،هئچ، لاپ گئری یه  قالمیش بیر یئردیر.سن اورادا قالارکن هئچ بیر یئره چاتمایاجاقسان.

ائله او زامان دوروب وآتدیملایاراق شهرین چؤلونه ساری گئتدی.یازین اوللری ایدی .بوتون گؤزه للیکلر گؤزونون اؤنونده سرگیلندی.گؤزل باغلار ،زمیلر روحونو اوخشاماغا باشلاییب ،گول قوخولو هاوا جییرلرینه دولدو و وطن دوغاسی نین(طبيعتينين) گؤرکمی اونو سرخوش ائتدی.گؤزلری دولدو وداشدی.باخیب و اؤزونه دئدی :من نئجه بوردان آیریلیم.نئجه گئدیم او توستولو هاواسی اولان یئرده قالیم؟داها بسدیر غوربتده یاشاماق ایسته میرم.اؤز ائویمده اؤز کوچه مده اؤز شهریمده یاشاییب اؤز خالقیملا اوز به اوز اولماغی  واؤز دیلیمده  دانیشماغی سئویرم

آدامی تانی یا ن یئرده قورد یئسین..

بیر بایاتینی اوجا دان سؤیله دی:

عزیزیم کتن یاخشی

گئیمه یه کتن یاخجی

گزمه یه غریب اؤلکه

اؤلمه یه وطن یاخجی

یئنه ده ا ؤز شهرینده قالماغی سئچدی و اؤزونه یئنی بیر ایش قوروب و دوغوردان دا نه قدر چالیشدی....

بو خاطیره له ری دوشونندن سونرا یئنه ده یاز چاغیندا دیرچله لن یوردونا ،ساوالانا باخماغا باشلادی و بو تورپاقلار وبو داغلارا نه قدر باغلی اولدوغونا بیر داها دریندن ایناندی.یئنه ده اؤزو- اؤزونه  دئدی:

او زامان اوزاقلارا گئتسه یدیم نئجه یاشایاجاقدیم؟اؤزو و او کؤچوب اوزاقلارا گئدن دوستلارینین آراسیندا اولان قاباریق و گؤزه چارپان دوروم  فرقینی بیلیردی.اونلاری قات -قات بلکه ده هئچ اؤلچویه گلمه ین قدر،اوزوندن اوستون دورومدا گؤرسه ده ،اؤزونه دئدی:

هرنه اولورسا اولسون من یئنه بوردایام.هر گونومون سون واختلاریندا گلیب بورالاری گؤروب و یاشاییرام.اونلار" من "دئییللر ،منده "اونلار" دئییلم .

بیر داها گؤزلری یاشلا دولدو و سؤیله دی:

"لعنت سنه وطن ،سن نقدر گؤزلسن"

سعیدفیوضات 14/7/91