درباره من

.
.
.


یانسین دیلیم آغزیمدا دئسم نازینی آز ائت
ناز ائت منه ای سئوگیلی جانان منه ناز ائت

...
اول باخیشیندا منی حیران اله دین سن
بیر اینجه گولوش له اوره گیم قان اله دین سن
سونرا منی بیر لوطف ایله خندان ائله دین سن
کافر قیزی آخیر منی صنعان ائله دین سن
یانسین دیلیم آغزیمدا دئسم نازینی آز ائت
ناز ائت منه ای سئوگیلی جانان منه ناز ائت

خلق ائیله میش ئوز کیفی گلنده سنی تاری
اولدور، بو بلادن منی قورتار سنی تاری!
رحم ائت منه، بیگانه یه ناز ائیله مه باری
آلقیش ائله بیر عاشیقه وار سن کیمی یاری
انصاف ائله ئوز عاشیقینی محرمی- راز ائت
ناز ائت منه ای سئوگیلی جانان منه ناز ائت

آیینه نی حسرتده قویوب عکسی- جمالین
خورشیدی خجالت ده قویوب عاریضی- آلین
عاشیقلر ی حسرتده قویوب زولف ایله خالین
بلکه اولا قیسمت بیزه گولزاری- وصالین
هردن بو سینیق کونلومی بیر لوطف ایله ساز ائت
ناز ائت منه ای سئوگیلی جانان منه ناز ائت

دونیا اوزونه یاخشی گوزللر گلیب هرچند
اولماز سنه بیر اولکه ده نه مثل، نه مانند
تبریز، باکی، تهران، شکی، شیروان، قبا، دربند
گنجه، قاراباغ، شهری- بخارا و سمرقند
ایسترسن اگر، عزم ره مولک حجاز ائت
ناز ائت منه ای سئوگیلی جانان منه ناز ائت

واعظ ائله ظن ائیله مه، حقی دانیر عاشیق
نه کعبه، نه بوتخانه، نه مسجد تانیر عاشیق
لاکین ئوزونی حق سئون انسان سانیر عاشیق
دونیا دا فقط بیرجه محبت قانیر عاشیق
سن گئت هله ئولموش لره تکلیفی- نماز ائت
ناز ائت منه ای سئوگیلی جانان منه ناز ائت

 

درج شده در تاریخ ۹۲/۰۱/۲۴ ساعت 17:24

کاربران آنلاین (1)