چند شعر از حسین رزمی

 

1

پوزولماسین ایلاهی

سیلاحلارین لوله سینده ...

هؤرومجه یین

بالاسینا اوخودوغو لایلاسی ...

2

... بودا یار

قاشی نین یایلا آیی اوخلادیم

چکدییین داغلاردا « آه » ی هاخلادیم

شعریمین یاریسین چنه ساخلادیم

دوداغین قان سالدی « آی شعیر قیزی »

 

بوراخ ، اوره یینی قوی سئوسین منی

گؤلرین ائله سین اؤزو بیله نی

چاخیشدیر چاخیردا ، چاراملا چنی

چال کی ، چال ها چال دی « آی شعیر قیزی »

 

اوستا اللرینده اؤلمه مک اولمور

او اؤلوم قوینوندا گولمه مک اولمور

گوللردن گولله یه گلمه مک اولمور

آل لار منی آلدی « آی شعیر قیزی »

 

شاعیرین نه یی وار اورک دن ساوای ؟

هئچ بیر قصدی یوخدور اؤلمکدن ساوای

هئچ نه ایسته مه دیک چیچکدن ساوای

گؤزوموز سارالدی « آی شعیر قیزی »

 

قورتاریر نفسیم قورتار شعریمی

آز سیخ گؤزلرینی بوغار شعریمی

سن اینینه گئیجک بو دار شعریمی

منیم اؤلوم قالدی « آی شعیر قیزی »

3

سویونوب سریلیرگونه

منی اؤلدوره - اؤلدوره

اورَییمه گیریر یئنه

منی اؤلدوره - اؤلدوره

 

گئجه نی یاخیر قاشینا

باخماییر مئیین یاشینا

قانیمی چکیر باشینا

منی اؤلدوره - اؤلدوره

 

گؤزلریمی توتور دیله

گولله لردن گوله – گوله –

چیخیب گلیر بمدن ذیله

منی اؤلدوره - اؤلدوره

 

یاخینلاشیب گؤزدن وورور

شعریمی قانیمدان سورور

گلیب – گلیب جاندا دورور

منی اؤلدوره - اؤلدوره

 

آختاریر شهری بیر – بیر

گؤزلرین قانلی سین سئویر

حؤکم ائدیر « دینی نی چئویر »

منی اؤلدوره - اؤلدوره

4

پیان گرایلی سی

 

تانری بوگون رحم ائیله سین

قیرغین دوشوب تئلدن- تئله

اونون حارامی گؤزلری

یئنه مئیلین وئردی زیله

 

گؤزلرینه چاخیر یاخیر

ساغدان ووروب ، سولدان چیخیر

گرایلی مین ائوین ییخیر

لاپ اوزومه گوله – گوله

 

گؤزللی یین فاجیعه سی

دلی لر  گؤزللمه سی

ادالارین بیردنه سی

تانرینی دا گتدی دیله

 

شربت نه دیر ،  شکر نه دیر

آغی نه دیر ، زهر نه دیر

بوظالیم اؤزو هرنه دیر

گاهدان بئله ، گاهدان ائله

 

دورمایین ، قاباغین آلین

کؤنلومو  الیندن آلین

بو پیاندان خبر آلین

خئییر اولا هاردان بئله ؟

5

چنلی اوزان

 

خایالیندا  گؤی  قورشاغی ،

پاپاغیندا بیر زیروه چن .

چانتاسیندا دنیز یئلی ،

روحوندا شئح داملالاری ،

آستانادان

أسیب کئچدی

چنلی اوزان ...  

یاش چوخاسین چیخاردیبان ساچلارینی قورولادی

سونرا چؤکوب

ألین توتدو اوجاق اوسته .

دئدیم :

سؤیله دالغالاردان !

اورَییندن داشان ماهنی ،

باسیب قیریب ، کؤینه یی نین دویمه لرین

تومارلارکن سینه سی نین  آغ توکلرین .

دئدی :

«اوردا روحدان چاخیر دامیر

اورکک خایال ماهنی امیر

اوردا جونون وئریر امیر

اوردا خومار آدلی قیز وار .

 

پیان کلمه آذان دئییر

قیبله اؤزون شئعره اییر

عشق اینینه کولک گئییر

اوردا چن لهجه لی گؤز وار

 

ایلهام حئیران قالیر اوردا

ناماز لزگی قیلیر اوردا

تانری میصری چالیر اوردا

هر آیه یه مین قوپوز وار».

چوخاسینی گئیه – گئیه

دئدی :

«گل آل ! بودا سنین سووغاتین دیر»

چانتاسینی آچان لحظه

چن بورودو اوتاغیمی

دورولاشدیم

خالچامداکی

جئیرانلاردا  بودره دیلر...

سونرا ، دوروب یاواش- یاواش

اوزاقلاشیب

ایتدی چنده ...

چنلی اوزان ...

6

اوخال نه خالدیر ، دؤشه دؤیدورموسن؟

 

هئچ بیری بیر کلمه دانیشمادیلار

نه اووچو

نه فره

نه

دره ....

اوچ للک

گیلئیلی لیک

او لوندو

یئره ....

7

بایاتی لار:

عاشیق جانین ساز آلار

گول نازینی یاز آلار

کیرپیک چالما عزیزیم

ایکی اولدوز آزالاز

 

قورخا – قورخا یئتن گول

ایچین – ایچین اؤتن گول

یاز خبرین وئرجک

تابوتومدان بیتن گول

 

یاریلدیم یارلیغیندا

اریدیم قارلیغیندا

وارلیغین گیزلنیبدیر –

او گیزلین وارلیغیمدا

 

قوی های اولسون ، هوی اولسون

شنلیک اولسون ، توی اولسون

سویون گیر اوره ییمه

هر نه اولاجاق قوی اولسون

 

عاشیق یاندی سؤز دوشدو

کؤز اوستونه کؤز دوشدو

بیر قیز گؤیه گؤز ووردو

گؤیدن بیر اولدوز دوشدو

 

من   آشیق  یاراداندی

یارداندی ،‌  یاراداندی ؟

یاریق – یاریق  یاریلدیم ،

یار  داندی ،‌  یارا   داندی

 

من آشیق داغیداندی ،

داغ چکن ، داغی داندی

گؤزلرین ائولر تیکن ،

قاشلارین داغیداندی