دیلیمی قایتارین منه

دیلیمی قایتارین منه
غربت ائلده غریبسه‌دیم
ائلیمی قایتارین منه!
درد‌لریم کؤز باغلاییب
سئلیمی قایتارین منه!

آختاریرام حزین- حزین
ایتیردیگیم گولون ایزین
دونیادا هر نه وار سیزین
گولومو قایتارین منه!

دیل دئییرم… منی آنمیر
سسله‌ییرم، او دایانمیر
نوه‌لریم منی قانمیر
دیلیمی قایتارین منه!

یاخ اورمودان گؤی خزره
اوخشار سنی هر منظره
بو آذردن او آذره
ایلیمی قایتارین منه!

آذری‌یم ائلیم، واریم
هارای سالیر سؤز قاتاریم
سوسوز قالیب سونالاریم
گؤلومو قایتارین منه!

شاعر ده وار سؤز اوینادان
گونبز اوسته قوز اوینادان
فقط منه گورز اوینادان
الیمی قایتارین منه!

دیلیم گئتسه قالار نه‌ییم
نئجه بو درده بئل اییم
نسیمی‌دن اؤیرندیگیم
تعلیمی قایتارین منه!
استاد هاشم ترلان