کونلومه تبریز دوشودو

گلدی مین دیللی باهار کؤنلومه تبریز دوشدو
گوللو سونبوللو باهار کؤنلومه تبریز دوشدو
تبریزین دردی منیم دردیم اولوب ایللردی
اوردادیر نازلی نگار کؤنلومه تبریز دوشدو
باجیمی قارداشیمی سئوگیلیمی گؤرملییم
یوخ دگیشمز بو قرار کؤنلومه تبریز دوشدو
چوخدا دونیادا گؤزل آدلی شهر مین مین دی
هر یئرین اؤز آدی وار کؤنلومه تبریز دوشدو
من سلیمان کور آراز نغمه لی شاعر بابایام
چکیرم عالمه جار کؤنلومه تبریز دوشدو