ایلین گون بؤلوملری

اؤنجه یایینلانمیش: ائل دیلی و ادبیاتی درگیسی، 9-جو سایی، 1382-جی ایل و

 بابیللی: بایرامدان قیرخ بئش گون گئدن، تورپاغین گؤیَرن و یئمین مال- حئیوان آغزینا گلن چاغینا دئییرلر.

بؤیوک چیلله: چیلله گئجه‌سینین صاباحیندان باشلانان قـیرخ گونلوک بیر موددت‌دیر، «دئی» آیی‌نـین بیریندن بهمن آیی‌نـین اونونا قده‌ر بیر موددت.

چار- چار: بؤیوک چیلله‌نین سون ایکی گونو و کیچیک چیله‌نین ایلک ایکی گونونه چار- چار دئییلیر. ائلین آراسیندا قارین وام [آستا] و اوینایایا – اوینایایا یاغماسینا دا چار- چار دئـییرلر.

چیلله گئجه‌سی: آذر آیی‌نـین سون گئجه‌سی و گئجه‌لرین ان اوزونو. (فا. یلدا).

خیدیر: بؤیوک چیلله‌نین قوتاران گونو و کیچیک چیله‌نین ایلک گئجه‌سینه خیدیر دئییرلر، کاووس اوغلو خیدیرین آدی دا او گئجه و یا گوندوزده دوغولدوغونا خاطیر قویولموشدور.

دارغان گونو: «ایسفند» آیی‌نـین سون گونو، گاهانبار بایرامی= خیلقت گونو.

زومار آیی: یایـین سون آیی شهریور زومار آیی آدلانـیر.

سئرچه کوله‌یی: «ایسفند» آیی‌نـین سون اون گونلرینین اورتا اوچ گونو «ایسفندین 26-24- جی گونلری».

شئشه: بایرام‌دان اوتوز آلتی گون گئده‌نه قده‌ر، ائلات‌لار شئشه دئـییله‌ن بو موددت‌ده مال- داوار اوچون یئم زوماری ساخلایارلار.

قاری کوله‌یی: «ایسفند» آیی‌نـین ایکینجی اون گونودور.

قورا آیی: یازین اوچونجو آیـینا [خرداد] قورا آیی دئییلیر.

قورا بیشیره‌ن آیی: یایـین ایکینجی آیی [مرداد] قورا بیشیره‌ن آیی آدلانیر.

قوش کوله‌یی: «ایسفند» آیی‌نـین سون اون گونلرینین ایلک اوچ گونو «ایسفندین 23-21-جو گونلری».

کله‌وز: اون یئددی گون پاییزدان قالاندان، آذر آیی‌نین اون اوچوندن بیر موددته کله‌وز دئییلیر. ائلات ایچینده بئله بیر ریوایت وار کی، آذر آیی‌نـین اون دؤردونجو گئجه‌سی داغ کئچی‌لری گؤزلرینی اولکر اولدوزونا تیکیرلر، اولکری گؤردوکده ائرکک‌لر دیشی‌لرله جوتله‌شیرلر.

کورد اوغلو گئجه‌سی: کیچیک چیلله‌دن سونرا گله‌ن ایلک گئجه‌یه کورد اوغلو گئجه‌سی دئییلیر.

کورد اوغلو گونلری: «ایسفند» آیی‌نـین ایلک اون گونودور.

کیچیک چیلله: ایییرمی گون موددتینده «بهمن» آیی‌نـین اون بیریندن اوتوزونا قده‌ر کیچیک چیلله دئییلیر.

لئیسان آیی: یازین ایکینجی آیینا [اردیبهشت] لئیسان آیی دئییرلر.

وعده یئلی: «ایسفند» آیی‌نـین قالان سون اوچ گونونون ایلک ایکی گونو «ایسفندین 28- 27 – جی گونلری».

 منبع: ائل بیلیمی