قهرمان قیزی

دویغوسو آلوولو ، اوره یی تمیز

ووقاری ساوالان ، گؤزلری دنیز

ائل اوچون مهربان ، ائل اوچون عزیز

آی آزاد ائلیمین قهرمان قیزی

بؤیوت قوجاغیندا کوراوغلولاری

بو اودلار یوردونون قور اوغلولاری

کؤنلونه دیمه سین خور اوغلولاری

آی آزاد ائلیمین قهرمان قیزی

سنه بئل باغلاییب بو خالقین اؤزو

آنالار یولداشی ، آتالار گؤزو

سن اولو تانری نین ان شیرین سؤزو

آی آزاد ائلیمین قهرمان قیزی

نبی لر ، بابک لر آناسی سن سن

چیچکلر گول آچار دانیشیب دین سن

تکجه آنا دئییل بوتون وطن سن

آی آزاد ائلیمین قهرمان قیزی

(بابک قوجازاده)