آنا دیلی گونونه گورا بیر شعر

اؤزلویون اونودوب دانیب اصلینی

اوزولوب نسلیندن قیریب وصلینی

قاییتمیر اصلینه تاپا نسلینی

آرا یئردن آوارادیر بعض آدام

چیخاردیب یادیندان آنا دیلینی

سیلیب خاطیریندن اوبا ائلینی

خالقا خائین اولوب ازیب بئلینی

آرا یئردن آوارادیر بعض آدام

نه دوس قالابیلیب نه دوشمان اولوب

اؤز بیتدییی کؤلو کؤکوندن یؤلوب

تیکیلیب یاد یئره سارالیب سؤلوب

آرا یئردن آوارادیر بعض آدام

وئریب اؤزگه لره هر اختیارین

یؤخ ائدیب خالق ایچره اؤز اعتبارین

ال آچیب دیله نیر اؤزگه دن وارین

آرا یئردن آوارادیر بعض آدام

اومود اولمام بئلنچیلیک آداما

یؤل گوسترسم دئییه جک گل جاداما

تورک دانیشما سئس وئر منیم صداما

آرا یئردن آوارادیر بعض آدام

اومود زنگانلی