سنین ایچین...

کوءنولدن نیسگیلی پوزماق ایسته دیم
یازاندا گوءروشدن یازماق ایسته دیم
ایلک عشقین اودونا قیزماق ایسته دیم
اوغورسوز محببت منه یوخ دئدی!

اوجا زیروه لره قالخماق ایسته دیم
داغلاردان دوزلره باخماق ایسته دیم
قوشولوب چایلارا آخماق ایسته دیم
بیر گیزلی خیانت منه یوخ دئدی!

عاریفم سسیمی یایماق ایسته دیم
تورپاغین عطریندن دویماق ایسته دیم
بیر اوغول لذذتی دویماق ایسته دیم
اونودا طبیعت منه یوخ دئدی!

حوسین عاریف