وبالي دیيه‌ن‌لرين بوينونا، شاه زماني دولت أليندن كند اهـلـي بيـر يـــولـلـوق زارا گلميشدي. يالان
سؤزدن فايدا يوخدور. دولت كتدي‌لري دارا قـيـسنـامـيــشدي اركـك سيزده دوغون ديشي سيزده.
يــوخـا قـلم ايشلـه‌مـز. گؤزل‌آباد كندينده يئددي قونشو بير قازانا محتاج‌ايدي،هاردا قالسين هله دولته
ائحسان خئيرات وئرسين‌لر. كند اهلي: «گوروموز وار كفني ميزده اولسون؟!» دئييردي دولتده:
«چوبانين گؤولو اولسا قره سودان قايماق توتار» سؤيله‌ييردي. ايش لاپ پيـس يـئره چكـميشدي. ولوله
زلزله‌دن كپچميش‌ايدي. گونلرين بير گونو كتديلر ايپين اوجونو تاپديلار. ائل گوجو سئل گوجو. كتديلر
توپلاشديلار. بؤرك‌لرين قاباغا قويوب اوتوردولار دوشونمه‌گه. بونلار بوردا دوشونمكده اولسونلار من سيزه
خبر گتيرمك‌ده. ائله بو آندا گون نم هاردان چيخيركي دولت آداملاري دا يئتيريرلر.
كنـد اهلي‌نين ايگي‌گؤزو وارايـدي بيـرينده بـورج ائله‌دي. بو قره او قره‌لره بنزه‌مز ايدي. هاميسي
شرطي شوخوم‌دا كسمك ايستيرديلر، كندين مئيدانيندا بير سس دوشموشدو گل گؤره‌سن. سؤز
واختينا چكر. ائله بو واختلارايدي كي كتديلر آز قالدي بوينوز چيخاردالار. نئچه نفر توفنگلي،زيرناچي
بايرامين قول قيچيندان ياپيشيپ باسديلار ماشينا. كتديلر گليپ اؤزلريني تاپانا ايش
ايشدن‌كئچميش‌دي.
زيرناچي بايرامي آپارميشديلار. زيرناچي بايرام طوي‌لاردا چاليب اوخوياندا،شاها تعريف دئمه‌ميشدي.
كند اهلي‌نين ايكي الي اولدو بير باشي. نئيله‌سينلر نئيله‌مسينلر دوشدولر يولا. آز گئتديلر چوخ
گئتديلر بير قدر يول گئتديلر. گئديب ضامن اولوب زيرناچي بايرامي حبس‌دن قورتارديلار. هاننان ـ گئژدن
كنده قاييتماق ايستيرديلركي بيردن بيره، « يورقان‌علي» دئدي: « همي تجارت همي زيارت، بوراجان
گلميشيك گلين گئده‌ك بير مدرسه‌نين ده تكليفيني سوروشاق. دئيه‌سن آغلامايانا ممه يوخدو...»
آخشاما ياخين‌ايدي كي كند اهلي كور پئشمان قاييتديلار. آمما كور توتدوغونو بوراخمايان كيمي گؤزه‌ل
آبادلي لاردا اوزدن گئده‌ن دئييل ديلر. گون ايله باتيب گون ايله چيخيرديلار. دولت اونلاري قاپيدان
قوووردي اونلار باجادان گيريرديلر. آمما آدام گرك انصافيني آياق آلتينا قويمايا. كتدي‌لرين اوزو آياق
داشي اولسايدي دولتين اوزو دوه ديزي‌ايدي. درد چوخدي ائشيدن يوخ. كتدي‌لرين ايشي سويوق دمير
تاپداماغا چكميشدي. دولتده شيطان آتيندان انميردي. كتديلر دئديكجه دولتده دئييردي:ـ «ياي وار
قيش وار، چوخ ايش وار.»
دولت دیيه‌ن‌ده اولدو،نه گـؤزه‌ل آبـاد كندينـده مـكتب تيكيلدي نه‌ده كندين اوچولموش ويرانا مدرسه‌سي
دوزه‌لدي. دولت مدرسه تيكديرمگه اوچ‌مين مئتیر توپراق كتدي‌لردن ايسته‌ييردي. سو اولمايان يئرده
تيمم واجب اولان كيمي،كندين مسجديندن مدرسه عوضينه استفاده ائتمگه باشلاديلار. آيري بير يول دا
يوخ‌ايدي. آمما بودا چوخ چكمه‌دي. شرع بو ايشه يول وئرميردي. بئله‌ليكله مدرسه بير يوللوق تعطيل
اولدو. شاگردلرده هره‌سي بير يانا داغيلديلار. بيري گئتدي ناخیرا ، بيري گئتدي داوارا بيري گئتدي...
اَيري اوتوراق دوز دانيشاق، هاننان گئژدن دولتده رحمه گلدي. گؤزه‌ل آبادا دا مدرسه تيكديرمگه سؤز
وئردي. «معارف» رئيسي مدرسه تيكديرمك موشتولوغونو گؤزه‌ل آبادلي‌لارا وئره‌نده،كتدي‌لرين
هاميسيني گولمك باسميشدي، اؤز ـ اؤزلرينه دئييرديلر: «ائششگيم اؤلمه يونجا بيتينجه، يونجا
سارالما توربا تيكينجه«
آمما شيطان قولاغينا داش ـ تورپاق، يونجا ساراليب ائششك اؤلمه‌ميشدن قاباق دولت مكتب آچدي.
گؤزه‌ل آبادلي‌لار سؤينجك‌لريندن دوه‌كيمي اويناماغا باشلاديلار. زيرناچي بايرام‌دا قورخمادان ائله زيرنا
چالدي كي دؤردونجو گؤيون ملك‌لري قولاق‌لارين توتا ـ توتا آلتينجي گؤيه اوچوب زيرنا قورتولانا قدر اورادا
اجاره‌نشين اولدولار.
قديمدن دئميشلر: « دوه اويناياندا قار ياغار» ائله‌ده اولدو. زيرنا قورتولا قورتولدا خبرگلدي‌كي مدرسه‌نين
معلمي گليـر. ممـه يئيـه‌ندن پپه يئيه‌نه قدر باشماقلارين قولتوقلارينا ووروب باشلاديلار كند بويو
قاچماغا. كتدي‌لرين بعضي‌سي ائله قاچيردي كي ائله بيل طلبه أليندن كئفلي قورتولوب. هاننان ـ
گئژدن آغا معلمه چاتديلار. سلام وئريپ جواب آلان خوفوندان قورودو. گؤزه‌ل آبادلي‌لار ياغيش‌دان
قورتولوب دامجي يا راس گلميشديلر. هره باخيردي او بيري‌سينين اوزونه. «يورقان علي» يه پيچاق
ويرسايدين قاني چيخمازدي. زيرناچي بايرامين زيرناسي آغزيندا قوروموشدو. گؤزه‌ل آبادلي‌لار دوشاب
آلميشديلار مربا چيخميشدي. كتده كيمسه معلمين ديليني قانميردي. هامي معلم ايله لال اويوني
كيمي دانيشيرديلار. آخي اونلارين هئچ بيري فارسجا دانيشماغي باشارميرديلار...
آي‌لارايدي گؤزه‌ل آبادلي‌لار ايش ـ پئشه‌لرين بوراخيب معارف اداره‌سينه يول دؤيوردولر. زيرناچي بايرام
معارف اداره‌سينه گيريردي يورقان علي چيخيردي. يورقان علي گيريردي زيرناچي بايرام چيخيردي.
تاكي معارف رئيسي سؤز وئردي فارس معلميني دگيش‌سين. معلمي دگيشه‌نه‌جك معارف رئيسي
اؤزو اوننان تئز عوض اولور. هر نئچه گوندن بير، يئني بير رئيس تشريف گيتيرير او بيري رئيس تشريف
آپارير. آمما گـؤزه‌ل آبـادلـي‌لاردا اوزدن گئتميرلر. اوقدر معارف اداره‌سينه يول دؤيورلركي بوتون «معارف»
اهلي اونلاري تانير. حتي ائشيتديگيمه گؤره آخيرلاردا،زيرناچي بايرام زيرناني بوشلايير و يورقان علي
ايله بيرليكده اكابر كلاسينا گئتمگه باشلايي ر.آخي اودا ياواش ـ ياواش ائل درديني بوراخيب شاه
دولتينده ، رئيس اولـمـاق فـيـكـريـنـه دوشــموشـدور..
************************************************
قایناق : باشی بلالی دیلیمیز، علیرضا ذی حق
اعضای انجمن(67)
hosaedi )
ترکی آذربایجانی
تورکجه شعرلر
حکایت لر
خانه
مطالب(96)
دوستان (25)
گالری تصاویر (81)
کلیپها (11)
نظرسنجی (0)
چگونگی درج آگهی در سایت و قسمت تبلیغات
سایت و اپلیکیشن آموزش زبان انگلیسی urg.ir
تلگرام 
فیسبوک
تویتر
کاکتوس
به علت هزینه های بالا ممکن است سایت از دسترس خارج شود.
لطفا ما را در اینستاگرام دنبال کنید.
م.ا.رسولزاده: dogordan sg ol adam okhoyanda kif eyliir aga sag ol yashasin
میانا نیوز: ساغ اول قارداش
یاشا دوستوم.آما من بو سوزی بئله ائشیدمیشدیم : (( چوبانین گوولو اولسا گئچینین ارککینن سوت ساغار ))
آشقین-- گونای: «چوبانين گؤولو اولسا قره سودان قايماق توتار» یاشا دوستوم.آما من بو سوزی بئله ائشیدمیشدیم : (( چوبانین گوولو اولسا گئچینین ارککینن سوت ساغار ))