من ائلیمین سوزلرینی نئجه اوزگه دیله یازیم + کلیپ

من ائلیمین سوزلرینی نئجه اوزگه دیله یازیم

بیر سیز دئین من گوی‌گوزه نئجه قاراگیله یازیم

بیری دئیر دؤن ائله یه بیری دئیر باخ بئله یه

بیری دئیر بئله یازیم بیری دئیر ایله یازیم

قولاقیمی باتیرسادا قارقالارین قاریلتی سی

من یاریما سوز وئرمیشم سوزلریمی گوله یازیم

دلی لردن عیواض خانی موغانداندا خان چوپانی

ستارخانی تبریزینه سونانی دا گؤله یازیم

مندن تعریف ایسته سزده دئین آلا گوزدن دئیم

مندن یازماق ایسته سزده قویون دورنا تئله یازیم

رستم گئتسین دماونده آغ دئوینی قاوالاسین

منده گلیم کوراوغلونی قارلی چنلی بئله یازیم

آی خان چوبان آراز موغان من سارامی تاپاممادیم

دئیرم کی نه دئیرسیز بیر کاغیذدا سئله یازیم

یاز گلیبدی چمن، ینه آل یاشیلا بورونوبدی

آمما منیم گوزوم یولدا گله جکدیر هله یازیم

آی گوزلری دولان بولوط نم نم چیله گوزیاشینی

اوخویورسان اوره گیمدن چیله بولبول چیله یازیم

من کی عشقین قوماریندا موفلوس چیخان بیر لیلاجام

نئجه دوروم ائله دئیم نئجه دوروم بئله یازیم

باشی دومان داغلار کیمی گوزی یاشلی باغلار کیمی

منیم قیشیم بئله کئچدی منیم کئچدی ائله یازیم

او گوزه ل کی منی سالیب اوز شهریمده دیلدن دیله

من ده گره ک اونون آدین داغا داشا چوله یازیم

آنجاق »وفا« سنه دئیم آغلاماقدان کئچیب ایشلر

سن آغلیا آغلیا دِه من دَه گوله گوله یازیم

شاعر : عبدالعلی آیرملو (وفا)