بختیار واهابزاده- آنا دیلیم

 

 

من چال دئدیم، اوجال دئدیم

من وور دئدیم، قالدیر دئدیم

سؤز هوجوم‏دور سؤز حمله دیر

بیرجه کلمه  بیر جمله دیر

سن دیلده کی قودرته باخ، ‌جرأته باخ

بیر جمله نی بیر کلمه یه سیغیشدیران

کلمه‏ده کی باریتا باخ

یوز ایللرین اله ییندن آریدیلمیش آریتا باخ

دده لریم بو سؤزلرین آلووونو گئیینیبدیر

اوره کلری بو سؤزلرین وورغوسو ایله دؤیونوبدور

قالخان تاخیب قالخ سسینه،‌ وروشوبدور وور سسینه

آخی نییه ده ییشدیرک

بیزیم قورقود آتامیزین یاراتدیغی کلمه لری

باشقاسینین گلمه سینه

نییه منیم آنام «مادر» نییه آتام «پدر» اولسون

بو دولاشیق تجارتده

نییه منیم دوغمالاریم

اؤزگه سینین تاپداغیندا هدر اولسون

نییه یادین بهمزینه بال دئمه لی؟

‌اؤز آشیما یال دئمه لی؟

نییه منیم آنا دیلیم

گلمه دیلین قاباغیندا

تیتیم-تیتیم تیتره مه لی؟

نییه  دوغمام یاد اولمالی؟

اؤز سؤزلریم اؤز دیلیمدن قووولمالی؟

هئچ گؤردونمو توراغایی

قارغا کیمی قا قا دئیه؟

هئچ گؤردونمو سیغیرچینی

سرچه کیمی جوککولدویه؟

سؤزلرینده میللت کیمی

اؤز ازلی صیفتی وار

هر کلمه نین اؤز جؤوهری فیطرتی وار

ده یییشنده یاد سؤزونه  اؤز سؤزونو اؤز لهجه نی

صیفتنی ده یییشیرسن

تانیمیرام اوندا سنی

آنلامیرام فیطرتین نه صیفتین نه

گؤوشویه نده سن اؤزگه نین سؤزلرینی

صیفت تاخدین صیفتینه

سن توپوردون اؤز بابانین اوجاغینا

آنان سنی بو اوجاغا اؤولاد دوغوب

سنسه گیردین اؤزگه سینین قوجاغینا

هر میللتین ان قیمتلی ثروتی دیر آنا دیلی

اؤولادلاری یئر اوزونده سپه له نسه

پرن- پرن دوشن لرین وحدتی دیر آنا دیلی

بو دونیانین هانسی اوزاق قوجاغیندا سسلنرسه

او قوجاغی منیم اوچون عزیزلدن آنا دیلیم

قوربتی ده وطن ائدن آنا دیلیم

سؤزلرینین نغمه سینده

روحوموزو جینگیلده دن آنا دیلیم

منی آنا وطنیمین بوتون اوغول قیزلارییلا

قوهوم ائدن آنا دیلیم

سن گؤزلره گؤرونمه ین بیر تئلسن کی

یول آچمیسان کئچمیشیمدن گله جه یه

آنا یوردون اؤز روحونو کئچیریرسن

بو نسیلدن او نسیله

او اورکدن بو اوره یه

اؤز دردیمی سئوینجیمی

دوداغیمدا چاغلادانیم

منی آنا وطنیمه

بو گونومو صاباحیما دوننیمه باغلادانیم

ائی سسیمه سس وئره نیم

سن ائی منیم وارلیغیمی یئر اوزونه گؤسته ره نیم

ائی شرفیم ائی بایراغیم

ائی آنامین کیتابیندا آدی قالان

دوغما ایکن اوگئی اولان سینه داغیم

ختایی نین قیلینجیندا فضولی نین غزلینده

بولؤوله نیب اورخاولانان سؤز کسه ریم

داغلاریمدان دامجی – دامجی سیزیب گلن اؤز اثریم

ائی بو گونو دیلیم – دیلیم

پارچالانان آنا دیلیم

سینه سینده اود قالانان آنا دیلیم

قاپیلارین آرخاسیندا بوینو بوکوک قالان دیلیم

وار ایکن یوخ اولان دیلیم

آیاقلاردا کیلیم دیلیم

ووروشلاردا بیر قهرمان

باریشلاردا حلیم دیلیم!

یادین فیتفاسییلا اؤز گوللـه میزله

اؤزگنین دیلینه اوو اولان دیلیم

مؤهورلو حوقوقلو ایداره لردن

داخمالار کونجونه قووولان دیلیم

عالی طبقه لر سنی داندی لار

سن بیر عوممان ایکن دایاز ساندی لار

اؤزگه نین دیلینده خوروزلاندی لار

سن ائی اؤز ساجیندا قوورولان دیلیم

ختایی تاختیندا سن فرمان اولدون

دیل لره حؤکوم ائدن قهرمان اولدون

بس نییه  سن بو گون پریشان اولدون

بابک قیلینجیندان اود آلان دیلیم

تاریخین یولونو کئچدین اوغورلو

سنه باتاممادی بیر قولو زورلو

دوننی مؤحتشم صاباحی نورلو

ایندیسی تاپدانیب اووولان  دیلیم

آنالی، آتالی، آ یئتیم دیلیم

شرفیم، شؤهره تیم قئیرتیم دیلیم

 

کؤچوره ن: م.پ