بختیار وهاب زاده....آللاه

 

ادراک دا یول آچمیش گئجه دن گوندوزه آللاه

گولدورمه سم اوز کونلومو،گولمز اوزه آللاه

دونیایا شفق لر کیمی تانریم سپه لنمیش

قلبین گوزو یانمازسا،گورونمز گوزه آللاه

 

آللاه بیلیریک جسم دئیل،بس نه دیر آللاه؟

أن یوکسک اولان حاقدا،حقیقت ده دیر آللاه

دوندون سا تکامل و گوزللیک قاباقیندا

درک ائت،بو تعجب ده بو حیرت ده دیر آللاه

 

بیلدیک،بیلیریک،گیزلیدیر اینسانداکی قدرت

هرکس اونو فهم ائتمه سه عاجزدیر او البت

اینسانین أزل بورجودور اینسانلیقا حورمت

اینسانلیقا حورمت ده،لیاقت ده دیر آللاه

 

گرچک ده بودور،گیزلیدیر هر ذره ده وحدت

بیر ذره ایچن،کولله قووشماق اولو نیت

گوردوکلریمیز ظاهری دیر،بطنه نفوذ ائت

باطن ده کی،جوهر ده کی،فطرت ده دیر آللاه

 

فطرت ده یاتیر سوزده،سوزون اوز یوکو فکریم

سئچمیش،سئچه جک،دائما توکدن توکو فکریم

من بیر آغاجام،یارپاقی سوزلر،کوکو فکریم

سوزلر ده دئیل،سوزده کی حکمت ده دیر آللاه

 

اینسان!تپه دن دیرناغا سن آرزو دیلک سن

نفسین ده دویوم سوز،فقط عشقین ده ملک سن

ظولمون اوزونه حاق دئیلن شیلله نی چکسن

شیللن ده موهورلنمیش او غیرت ده دیر آللاه

 

جاهل ائنر آلچاقلیقا،اوز قلبینه یئنمز

وجداننان اگر دونسه ده،خیرینن او دونمز

ظلمت ده،جهالت ده،عداوت ده گورونمز

ایلقاردا،صداقتده،محبت ده دیر آللاه