![شهریار شهریار](usr/istak/gal130.jpg?154151718)
اولدوز سایاراق گوزله میشم هر گئجه یاری
گئج گئلمه ده دیر یار یئنه اولموش گئجه یاری
گوزلر آسیلی یوخ نه قارالتی نه ده بیر سئس
باتمیش قولاغیم گورنه دوشورمکده دی داری
بیر قوش آییغام سویلیه رک گاهدان اییلده ر
گاهدان اونودا یئل دئیه لای لای هوش آپاری
یاتمیش هامی بیر آللاه اویاقدیر داها بیر من
مندن آشاغی کیمسه یوخ اوندان دا یوخاری
قورخوم بودی یار گلمه یه بیردن یاریلا صبح
باغریم یاریلا صبحوم آچیلما سنی تاری!
دان اولدوزی ایسته ر چیخا گوز یالواری چیخما
اوچیخماسادا اولدوزومون یوخدی چیخاری
گلمز تانیرام بختیمی ایندی آغارار صبح
قاش بیله آغاردیقجا داها باش دا آغاری
عشقین کی قراریندا وفا اولمیاجاقمیش
بیلمم کی طبیعت نیه قویموش بو قراری؟
سانکی خوروزون سون بانی خنجردی سوخولدی
سینه مده اورک وارسا کئسیب قیردی داماری
ریشخندله قیرجاندی سحر سویله دی:دورما
جان قورخوسی وار عشقین اوتوزدون بو قماری
اولدوم قره گون آیریلالی او ساری تئلدن
بونجا قره گونلردی ائدن رنگیمی ساری
گوز یاشلاری هر یئردن آخارسا منی توشلار
دریایه باخار بللی دی چایلارین آخاری
ار بس منی یاپراق کیمی هجرانلا سارالدیب
باخسان اوزونه سانکی قیزیل گولدی قیزاری
محراب شفقده ئوزومی سجده ده گوردوم
قان ایچره غمیم یوخ اوزوم اولسون سنه ساری
عشقی واریدی شهریارین گللی چیچکلی
افسوس قارا یئل اسدی خزان اولدی بهاری