بو گجه

یوخوما گلسن اگر ای گول خندان بو گجه

ائدرم گوزلرینه جانیمی قوربان بو گجه

آچمارام گوزلریمی بلکه باخام بیرده آیا

سنی گورسم یوخودا ای مه تابان بو گجه

اورگیم قانه دونوب هجریوی چکدیکجه گولوم

نه اولار ائتمییسن باغریمی چوخ قان بو گجه

لطف ائله سن منیم حاققیمدا بیر ایش گؤر کی داها

باشا چاتسین بئله بیر زهریلی هجران بو گجه

وصفینه هر نه یازام آزدی ینه چونکی سنین

تکجه بیر خالین ائدیب عالمی حیران بو گجه

«حا»ده سنسن «میم»ده سنسن «با»ده سنسن ای پری

یوخدی سندن صورا عشق اهلینه جانان بو گجه

ذکر ائدیللر آدینی گویده ملکلر گوزلیم

ایستیوللر گئدسن گویلره مهمان بو گجه

او قدر سنده گوزللیک یارادیبدیر یارادان

دیلیم عاجزدی ائده هامیسین عنوان بو گجه

بیر بئله فخر ائلمه یازدیقون ابیاته«جلال»

ائله شاعر تاپیلار کی یازا دیوان بو گجه