یئکانات

"                                            یئکانات "

قوربان اولوم یئکاناتین ائلینه

دره سینه داغدان آخان سئلینه

قایادان باغلاییب کمر بئلینه

                                    داماریمدا قیزیل قان سان یئکانات

                                    شیرین جانیم سنه قوربان یئکانات

قُولومون قدرتی ، اوره کده دؤزوم

نازلی سئوگیلیم سن آغزیمدا سؤزوم

سن منه عزیز سن ای ایکی گؤزوم

                                        سن سیز اولار قدیم کامان یئکانات

                                        شیرین جانیم سنه قوربان یئکانات

ظفرلر یارالدیب میللتین سنین

قوچاق لار بسله ییب غئیرتین سنین

دیللرده قالاجاق صؤحبتین سنین

                                         توپراغیندی منه رضوان یئکانات

                                          شیرین جانیم سنه قوربان یئکانات

بوردان باش قالدیریب نوراله خانین

شیرعلی، قوچعلی ، بخشعلی خانین

اونودولماز یاددان اول هادی خانین

                                          "کرم " سنده آلدی امان یئکانات

                                          شیرین جانیم سنه قوربان یئکانات

شیرین دیل شاعیرین "هدایتین" وار

گولر اوز، مهربان جماعتین وار

عزتین ، شوکتین ، نزاکتین وار

                                         قیمتین قورویار زامان یئکانات

                                         شیرین جانیم سنه قوربان یئکانات

سنده دوغولموشام وورغونام سنه

آتا – آنا کیمین عزیزسن  منه

"خانلارام " یاشیرام عشقینده یئنه

                                           ای منیم دردیمه درمان یئکانات

                                           شیرین جانیم سنه قوربان یئکانات