صحیفه سجادیه دن اوروجلوق آیینا چاتماق دیله یشی

دیله یش ( 44 )

اوروجلوق آیی چاتماق دیله یشی

1 )– حمد و آلقیش تکجه تانری نیندی که حمد و آلقیش لارینا، بیزه یول گورسددی و بیزی آلقیشلادان لاردان ائله دی، تا پایلارینا و یاخشی لیقلارینا گوره اونا شوکور ائداق و بیزه شوکور ائدماقا گوره یاخشی ایش گورنلرین ایشلیکین وئردی .

2 )– حمد و آلقیش او تانریا دی که دینین بیزه اویرددی و یولونی مخصوص جاسینا بیزه پای وئردی، و بیزی اوز لطف و یاخشی لیق یولوندا آپاردی، تا لطفون نن راضی لیقا یول سالاق و حمد و آلقیشی که اونی بیزدن قابول ائده و اوننان بیزه سئوینج اولا .

 3)– حمد و آلقیش تکجه تانـری اوچون دی که سئوینجینه چاتماق یوللارینین بیـــرین اوز آیـینی  ( اوروجلوق آیی ) ائله دی که اوروج توتماق آیی دی، اسلام آیی، پاکلیق آیی، ایچه رینی اصلاح ائدماق آیی، و آیاقا قاخماق آیی دی که اوندا قرآنی، مللتین هدایتینه و دوز یولون اورنکلری و حق وباطلی آیریدان ، نازل اولدی و گلدی .

4)– بئله ده بو آیین اوستونلوگون آییری آیلارا چوخلی احترامنان و چوخلی اوستونلوک لرینن بیلدیردی و بو آیی بویوک توتماقینان اوزادی که آییری آیلاردا حلالیدی بو آیدا حرام ائله دی و اونی اوستون توتماقا یئمه لی وایچمه لیلردن فایدالانماقی بو آیدا قاباقین آلدی و بللی بیر خاص چاغلار و وقتلر بیللندیردی و اجازه وئرمه دی که بو وقت قاباق سالینا یا دالییا دوشه .

5 )– بئله ده تانری بو آیین گئجه سین مین دنه آییری آییا اوستون ائله دی و اونا قدر گئجه سی ، اولچو گئجه سی، آد قویدی که اوندا تانری اذنینن ملائکه و روح هر بیر نمنه یه گلیرلر او گئجه تا صبح آچیلاناجان، ساغلاملیق  و همیشه لیک پای بنده لری نین هر بیرینه که ایسته سه و اوزادی که قضا و قدردن اولمالیدی گتیررلر.

6 )– ای الهی! محمد و اولادینا سلام و پای یوللا و بو آیین اوستونلوگون تانیماقا و حورمتین بویوک توتماقا و اوزادی که بیزلره بو آیدا یاساقلادیب و قاباغین آلیبسان اونلاری گورمامازلیقدا قالماقی بیزه دوشوندور و بیزه یاردیم ائله که اوروج توتاق او جوره که اعضالاریمیزی دا گوناهدان ساخلاداق و اونلاری اوزادا که سنین رضایتیین سبب اولار قاتاق، تا بو که قولاق لاریمیزنان بوهده سسلره قولاق آسمئیاق و چیرکین شکیللره باخمئیاق .

 7 )– و اللریمیزی حراملارا اوزادمئیاق و بیر آددیم حراما گئدمئیاق تا بو که قارینلاریمیز حلال دان صونرا دولماسین و دیلیمیز سن دئینلردن صونرا دئمه سین و اوزوموزی ثواب ایشلردن صونرا زحمت و آغرییا سالمئیاق و او زاددان که سبب اولار سنین آغریلارین نان و عذاب لارین نان سالم قالاق اونلاردان صونرا آییری گوروملری گورمویاق و صونرا بونلارین هاممی سین ایکی اوزلی لیقینن، اوزوموزی گوزه سالماقینان و تعریفلری سئوماقینان که بیــــزدن ائدسینلر، بونلاردان خالص ائله، تا بوکه بیر کیمسه نی سنین بنده لیقینده اورتاق ائدمئیاق و سنه چاتماقدان صونرا آییری بیر ایستک ده اولمویاق .

8 )– بار تعالا ! محمد و اولادینا سلام و پای یوللا و بیزی بئش وعده نامازی قیلماقدا و اونا بللی اولان احکاملاردا و بللی اولموش واجبلردا و بلل اولموش گوروملردا و بللی اولموش چاغلار دا یاردیم ائله .

9 )– ای تانری! بیزی او کیمسه لر تکین ائله که نامازین دورارلیقین ویئرین دوشونوبلر و نامازین ارکانین ساخلیرلار و بللنمیش چاغدا یوللادیگین بنده ین عنعنه سی کیمیــن ( سنین سلام و رحمتین اونا و اولادینا اولسون ) رکوع دا و سجده ده و هاممی فضیلت و اوستونلوکلرده لاپ بوتون پاکلیقینان و بللی آلچاق کونوللوق و اسکیک لیقینان گوروللر .

10 )– ای تانری! بیزه یاردیم ائله که بو آیدا اوز یاخین لاریمیزنان یاخشی لیق و قاتیشیقدا اونلارینان صله رحم ائداق و باغیش و پایلارینان قونشولاریمیزی یوموشاق کونوللی ساخلییاق و ماللاریمیزی پیسلردن پاک لییاق و زکات وئرماقینان اونلاری پاکلییاق و او کیمسه لردن که بیزی نن قیریبلار ایلگی سالاق و او کیمسه یه که بیزه آغری وئریب و ظلم ائدیبلر انصافینان داورانیش سالاق و قاجلارینان گئچیناق، او کیمسه ینن یوخ که یولوندا سنه گوره بیزه قاج دیر، نییه که او بیر قاج دیر که هئچ چاغدا اوننان یولداش اولماریک و او بیر گروپدادی که اونا محبت ائدماق اولماز .

11 )– ای تانری! بو آیدا ائله ایشلره بیزه یاردیم ائله که اونلارینان سنه یاخینلاشاق و بیزی سوچلاردان پاکلاداسان و بوکه گئنه ده پیسلیک لرین دالیسیجا گئداق بیزی ساخلاو ائله ائله که هئچ بیر ملائکه ن بئله بیر بنده دن قاباقا گئچماق گوجی اولماسین .

12 )– ای تانری! بو آیین حققینه و هر او کیمسه نین حققینه که بو آیین اولین نن صونونا کیمی بنده لیک ائدیب و او فرشته لرین حققینه که اونی قاپیندا حورمتلی ائدیبسن، یا او پیغمبری که گوندریبسن یا او صالح بنده نی که اونی خالص لردن ائدیبسن، محمد و اولادینا سلام و پای یوللا و بو آییدا بیزی کرامت چیخارینا یئتیر که اونی اولیالارا وعده وئریبسن، و بیزه واجب ائله او زادلاری که بنده لیگینده چالیشانلارا و زحمت چکن لره واجب ائدیبسن و بیزی او کیمسه لرین صف لرینده قویگینان که سنین رحمتین نن اوجا مرتبه لی یئرلره سنین یانیندا مستحق اولوبلار .

13 )– ای الهی! محمد و اولادینا سلام و رحمت یوللا و بیزی سنین بیرلیکیین دانانلاردان و بنده لیگینده اسکیک سالانلاردان و دینینده شاشغی ائدنلردن و یولوندا آزانلاردان و حورمتلی زادلاردان گوز اورتنلردن و شیطان قاجییان آلدانانلاردان، اوزاق لادگینان.

 14 )– ای تانری! محمد و اولادینا سلام و پای یوللا و اگر بو آیین هر گئجه لرینده بنده لری واردیلار که باغیشلیرسان یا سوچلارین نان گئچیرسن بئله ده بیزی او بنده لردن ائله گینان و بیزی لاپ یاخشیلاردان که بو آییا یاراشیقلیدیلار و بو آیین اصحاب لارین ناندیلار ائله .

 15 )–ای تانری محمد و اولادینا سلام و پای یوللا و هلالی گورسنماقینان و گونلری قورتولماقینان پیسلیکلری بیزلردن سیلگینان بئله که بو آی قوتولور بیر حالدا که بیزی یانلیشلاردان پاکلادیبسان و سوچ و گوناهلاردان خالص ائدیبسن .

 16 )– ای تانری! ای تانری محمد و اولادینا سلام و رحمت یوللا و اگر بو آییدا یولوننان چیخدیک بیزی دوز یولا گتیر و اگر قولای یولا گئددیک بیزی قایتار دوز یولا و اگر سنین قاجین شیطان بیزه مسلط اولدی بیزی اونون الین نن قورتار .

 17 )– ای تانری! بو آیدا بیزیم بنده لیگی اوز قاپیندا بوتون ائله و اونون وقتلرین بیزیم طاعت لریمیزینن بزکلی ائله و بیزی اونون گونلرینده اوروج توتماقینان و گئجه لرینده ناماز قیلیب و قاپیندا آغلاماقینان، و آلچاق کونوللوقینان و قاپیندا اسکیک لیقینان دورماقینان یاردیم ائله بونا که بو آیین گونلری بیزده یانلیشا و گئجه لری بیزده اسکیک لیق قویماقا تانیق لیق وئرمه سین .

18)- بار الها! آییری آیلاردا و گونلرده و ائله عومروموزون صونونا کیمین،بو حالدا اولماقی بیزه پای وئر، و بیزی یاراشیقلی بنده لرین نن ائله ، او کیمسه لری که بهشت اونلارین ارثلریدی، و اوندا هر چاغلی قالاجاقلار ،او کیمسه لری که هر نمنه لری واردی تانری یولوندا وئریرلر، آمما کونوللری قورخولیدی بونا گوره که تانریلارینا ساری قایئدیرلار.

19 )– ای الهی! محمد و اولادینا هر چاغدا و هر زاماندا و هر حالدا سلام و پای یوللا، ائله بیر سلامی که هاممی سلام لارین اولچوسونده اولا و اوننان بیر چوخ سلامی که سن نن صونرا آییری بیر کیمسه ائیلیه بیلمئیه اونی حساب لادا ، که سن نمنه ایسته سن ائدن سن.