درباره من

بوفه
ائولره سلطه سالمیشام
ائو خانیمین سیندیرمیشام
باخیش منه سالمالی دی
گوزی منده اولمالی دی
الهام وئرنی اولمیشام
دوشونوش آرتیرمامیشام
بسه بس لیقدا قالمیشام
گوز گولونی دولدورموشام
من نن فیکیر خیردالیری
من نن کیمسه آز قانیری
آییریسینی سیندیرمیشام
سلطه یه آلقاش اولموشام
من ده قاجیمی تانیرام
سیندیرماقیندا اولورام
منده کتاب گورن اولماز
کتاب منده قالان اولماز
کتاب دئین منی سئومز
باخیشلارین منه وئرمز
بئله سی دیر قاجیم اودیر
دوشوجه لیک قاجیم اولار
ساده لیگی من ایستیرم
درین لیگی دا نئینیرم
سلطه سالان من نن سالیر
اولوسی ساده ساخلادیر
ساده لیک احمق لیک ده دیر
احمق لیک ساده لیک ده دیر
منی دئین اخمق سئویر
سلطه سینه ساده سئویر
سلطه چی نن ایلقاریم وار
اولوس دان بسله دیم داوار
سلطه چی منی یارادیب
اولوس ایچینده ساخلادیب
***

بوفه 2
باخیشا گورسنمئین گیزلین اولان بیر قاج دیر
بئینلری پاسلادیر ایشی بئین پوزمادیر
بوفه بیر یئر توتوبدی ده یرلی نی قووالیر
اونملی یئر قاپسئیب ده یرسیزی ساخلادیر
فیکیر باغینا لازیم کتاب آخیم سالاندی
بوفه دینمز دانیشماز فیکیرلری پاسلادیر
چالیشمئیان اولانلار وارلیقین نان آیریدیر
دویوشموین کولتورلر آییریلارینا سینار
کولتورون پارلاق لیقین دویوش میدانی وئرر
بوفه سخسی تابوتی ، دویوشده نمنه ایستیر
بو کتاب دیر دویوشی دوشونجه ده بیلدیریر
کتابخانا واری دیر کتابلاری ساخلادیر
بوفه کتابین قاجی سویوموزا دا قاج دیر
دوشونجه نین آخیمین اولوسلارا باغلادیر
ایشیق فیکیر وارلارین آیریلیقدا یاندیریر
***
بوفه 3
سخسی قبیر ساندیقی نئجه بزک توتوبدی
شوشه لری یانینا سخسی لر اوزادیب دی
پریکس اولان ناشاتا ئولی تکین اولاندی
توپراقلارین توزلارین باش گوزلری آلاندی
دئیری ئولولری نن بونلار داها قالاندی
ئولمه میشدن ئولنلر بونلارینن اولاندی
ئولولری ساخلییان ائله ئولی اولاجاق
دئیریلردن آیریلیب آیریلیقدا قالاجاق
بیلیم دئیری ائدندی اسماء آدیندا اولوب
انسان اوستونلوگونی اویرنماقیندا قویوب
یارانیشیندا شیطان ، ذاتی انساننان خوشدی
انسان لجن نن اولوب اونلار توستوسیز اوددی
انسانی بیر فضیلت تانری وئریب قوزادی
روحون اونا پوفلویوب اختیاردا ساخلادی
ایدی مختارسان انسان لجنلری توتاسان
سخسی لری ئولی تک بوفه ده ساخلاداسان
یا که کتابخانانی کتابا دولدوراسان
بیلیم یولونی توتوب قانمازی قاندیراسان
البت که قاج ایسته میر بیزده بیلیم چوخالا
بئینلری پاسلادیب سخسی لرینن قالا
بو قاجلارین فیکری دیر بوفه لری دوزلدیب
ائو اوبامیز ایچین نن کتابخانانی سیلیب
اوستونلوگی آلماقا بیلیملی اولمالییق
ایشیق فیکیر قالماقا دوشونوش یازمالییق
کتابخانا سازلادیب کتابلاری ساخلییاق
اوستونلوگی توتماقا کتابدان یاردیم آلاق
***



 

درج شده در تاریخ ۹۹/۱۰/۱۶ ساعت 21:10

کاربران آنلاین (0)