سنون عشقون منه هر ورطه ده رهبردی حسین

سنون عشقون منه هر ورطه ده رهبردی حسین
گوزلریم نور جمالونله منوردی حسین
ملک الموت آلار جانیمی دسته گلونن
گورسه جان اوسته دلیمده آدون ازبردی حسین
نجه اوز مرتبه سین شاهلیقیلان ایلر عوض
او جنابی که قاپوندا سنه نوکردی حسین
حزب شیطان تاپا بولمز منیم ایمانیمه یول
قوخمارام تا سنون عشقون منه سنگردی حسین
تعزیه مجلسی جنتدی گلستاندی منه
چونکه هر ساعتی بیر عمره برابردی حسین
آتان حیدردی آنان فاطمه جدوندی رسول
مجتبا تک سنه ایستکلی برادردی حسین
بولارین هر بیری بیر فخریدی قوی بیر طرفه
بونا فخر ایله که زینب سنه خواهردی حسین
زینب امضاسیدی پرونده وی تکمیل ایلین
نجه زینب آدی هیئتلره زیوردی حسین
نجه زینب ایله سیندیردی یزیدین بلینی
دیدی تاریخ او مرحبدی بو حیدردی حسین
کوفه ده لرزه سالوب ابن زیادین جانینا
اوندا که گوردوله محمل اونا منبردی حسین
ظلم ظلام زمانه نه تضرع نه هراس
دیه سن بس ظلمات اوسته سکندردی حسین
نوک نی ده یارالی باشیوه باخدوقجا دیدی
گون دوروب نیزه بویوندا منه محشردی حسین
دوزدی آینده ده بیر محشر کبرا اولاجاق
بو گون اولمازکه بو اکبردی او اصغردی حسین
هاردا محشرده بو غوغا اولی بو حالتله
نه قیامت نه بو بیر عالم دیگردی حسین
هاردا یاتمیشدون او گل یوزده کل آثاری ندور
بو نه مهمان او نه منزل او نه بستردی حسین
آچ گوزون نیزده بیر باخ بو محجب باجیوا
جمع نامحرم ایچینده نه سخنوردی حسین
اظطراریدی منیم کشف حجاب ایلماقیم
چون حجاب عورته قانون پیمبردی حسین
ایلدیم شمریله بیر معجرین اوستونده جدل
شاهدیم عرضیمه بو دوغرانان اللردی حسین
من بو طوفان حوادثده سینان بیر گمیم
کوفه ده دارالاماره منه بندردی حسین
سیل امواج خروشان قاباقیندا دوزرم
سینه ده نازلی رقیم منه لنگردی حسین
دشمنین مین تکینه بیر دانا پاتک ووررام
آل هاشم ایکی دنیاده مظفردی حسین
پرچمیم شعله اهیمدی چکور باش فلکه
لشگریم یاسلی عزالی قره معجردی حسین
گیدیرم شامه یزیدی ایلیم خانه خراب
ملک نصر من الله منه لشگردی حسین
باشیمون قانیدی الوان ایلیوب ساچلاریمی
جنگ برنامه سینه پرچم احمردی حسین
گیدیروخ شامه حسین سن یارالی من یارالی
بو یولون زهریده حتی منه شکردی حسین
سنی شام اهلی اگر دوغرادی خنجردی حسین
باور ایت زخم زبانلار منه خنجردی حسین
او قدر کوفه لی لر دل یاراسی ووردی منه
اوره گیم برگ صنوبر کیمی پرپردی حسین
دوزرم صبریمیله ظالمی تخدن سالارام
گلمرم شکویه زهرا منه مادردی حسین
https://telegram.me/GorBand