آنا دیلی

«آنا دیلیمیزه اهمییت وئرمه سک ،اولا بیلر کی، بیر گون دیلیمیز ایتر،باتار، یوخ اولار و بیر میلتین ده کی،دیلی باتدی او میللت اؤزو ده باتار. چونکو بیر میلتین وارلیغینا، ایثبات -وجود ائتمه سینه سبب، اونون دیلی دیر.»

 اوزئییر حاجی بیگلی.

اوزئییر حاجی بیگلی نین احوالتیننان بیری

دونن لاپ بئله خط ماشینیندا یادیما کئچمیش بیر احوال دوشدو. اؤز-اؤزومه گولومسوندوم.

درسیمی اینگیلاستاندا قوتاریب کندیمیزه گلنده قونوم-قونشودان و دوست-آشنادان علاوه کندخودا بیر آز گئجیکمیشدی. آخی اوبریسی لردن فرقلنمک ایسته ییردی. او گلنده آرتیق آخشام چاغی ایدی و آنام دان باشقا ائوده بیر کس یوخ ایدی. آنام داکی، یازیق آرواد یاشماغینی برکیدیب کئچدی دهلیزه. کندخودانی قارشیلادیم:

-سالام ملئیکوم.

-آی السلامو علئیکوم، آی خداحافظ، احوال شریف، عناصر لطیف، ماشالله اخویزاده، نئچه موددتدی منتظر وجود ذیجودون و مشتاق دیدارون ایدیم. انشالله ذات عالی نین مجاز موبارکی سالیمدیر!

من بیر شئی باشا دوشمه ییب دئدیم؟

-یئس(yes)!

جناب کندخودا منیم اوزومه باخدی و یئنه باشلادی:

-اخویزاده، تحصیل فنونی باشا یئتیریب سن؟ یا دوباره تکمیل نقصان اوچون اینگیلیستانا عؤوت ائتمه لیسن؟

من یئنه بیر شئی باشا دوشمه ییب دئدیم:

-جناب کندخودا، دئدیکلرینیز یاخشی کونسئپشن(conception) اولمادی!

کندخودا دئدی:

-نئجه؟

من دئدیم:

-وات(what)؟

صحبتلریمیز ائله بوجور قوتاردی وکندخودا باشماق لارین گئییب ائودن چیخدی.

قاپی دالیندان دانیشیقلاریمیزا قولاق آسان آنام ایچری گیریب دئدی:

-بالا، کندخودا ایله هانسی دیلده دانیشیردینیز کی، من هئچ باشا دوشمه دیم؟

-آنا، کندخودا ایله آنا دیلینده دانیشیردیق!

آنام باشینی سالدی آشاغی و بیر قدر فیکره گئدیب دئدی:

-بو نئجه آنا دیلدیرکی، آنا باشا دوشمور!؟