وار سنین باشقا آنان، واردی منیم باشقا آنام

"سو" دئییبدیر منه اولده آنام، آب کی یوخ

"یوخو" اؤیرتدی اوشاقلیقدا منه، خواب کی یوخ

ایلک دفعه کی "چؤرک" وئردی منه نان دئمه دی

ازه لیندن منه "دوزدانه" ، نمکدان دئمه دی

آنام اختر دئمه ییبدیر منه، "اولدوز" دئییب او

سو دوناندا دئمه ییب یخدی بالا، "بوز" دئییب او

"قار" دئییب برف دئمه یب، دست دئمه ییب "ال"دئییب او

منه هئچواقت بیا سؤیله مه ییب،  "گل" دئییب او

یاخشی خاطیرلاییرام، یاز گونو آخشام چاغی لار

باغچانین گون باتیندا، کی ایلیق گون یاییلار

گل دئیه ردی، داراییم باشیوی ای نازلی بالام!

گلمه سن گر، باجیوین آستجا زولفون دارارام

او دئمه زدیر کی، بیاشانه زنم بر سر تو

گر نیایی بزنم شانه سر خواهر تو

بلی، داش یاغسا دا گؤیدن ،سن اوسان من ده بویام

وار سنین باشقا آنان، واردی منیم باشقا آنام

اؤزومه مخصوص اولان باشقا ائلیم واردی منیم

ائلیمه مخصوص اولان باشقا دیلیم واردی منیم

ایسته سن قارداش اولاق، بیر یاشایاق، بیرلیک ائدک

وئریبن قول- قولا، بوندان سورا بیر یولدا گئدک

اولا، اؤزگه کؤک لرله گرک آخمایاسان

ثانیا، وارلیغیما، خالقیما خور باخمایاسان

یوخسا گر زور دئیه سن میللتیمی خوار ائده سن

گون گلر، صفحه چؤنر، مجبور اولارسان گئده سن

"دوقتور محمد تقی زهتابی"