شعر درمورد امام حسین

 

افتخار بشریتدی حسین بن علی

 

**

باخ وصیتلرینه گور ندی اعلانیه سی

 

عمریوین قویما فنایه گئده بیر ثانیه سی

 

اونی ئولدوردی زیادین پسر زانیه سی

 

منی واژه غیرتدی حسین بن علی

 

دئدی من امتین اصلاحینه خاطر گئدورم

 

نهی منکردی یولوم امربه معروف ائدورم

 

نه فساده آچورام یول نه بیرین اینجیدورم

 

حامی دین و شریعتدی حسین بن علی

 

سیره جدیم عوالمده گرک غالب اولا

 

قان وئرم چهره دین جلوه لنه جالب اولا

 

زنده آئین علی بن ابی طالب اولا

 

سالک راه ولایتدی حسین بن علی

 

ای توکن گوزیاشی حسرتله او عطشان دودآقا

 

گور نه ایستور بیزیم امتدن او قارداشسیز آقا

 

گل حسینون یولونا،گئتمه صولا باخما صاقا

 

حامل پرچم وحدتدی حسین بن علی

 

کیم حسین شیعه سی اولسا اونا روشندی مرام

 

حفظ ائدر حرمت تقوانی یمز مال حرام

 

هم فروع و هم اصول اوسته باتوب قانه امام

 

عامل حکم شریعتدی حسین بن علی

 

او نمازی که حسین قیلدی یاراتدی هیجان

 

اوغلی اکبر یوخودی گویده ملک وئردی اذان

 

یعنی وقتینده گرک سنده نمازین قیلاسان

 

روح تقوا و عبادتدی حسین بن علی

 

کربلا کعبه رحمتدی حسین قبله جود

 

قتلگاهه یارالی دوشدی آتیندان او وجود

 

سجدیه قویدی باشین تا اوجالا رکن سجود

 

مشعل بزم حقیقتدی حسین بن علی