مالازگیرد دؤیوشو

مالازگیرد دؤیوشو

مالازگیرد دؤیوشو

سولطان بیرینجی توغرولدان سونرا حاکیمیته گلمیش آلپ آرسلان (1063-1072) بیرینجی توغرولدان سونرا ایشینی لاییقی اولدوغو کیمی داوام ائتدیردی. اونون یوروشلرینده اساس مقصد آنادولونو تورک تورپاقلارینین ترکیبینه قاتماق ایدی. آنادولویا هوجوم ائدن قوشونلارا آفشین، سوندوک، احمدشاه، تورکمن، ساوتکین، آیتکین کیمی جسور سرکرده‌لر باشچیلیق ائدیردیلر. سلجوقلار سیواس، قئیصریییه و قونیا شهرلرینی، ارچیش، اهلت، مالازگیرد و منبیغ قالالارینی اله کئچیردیلر.

بیزانس ایمپراتورو ائیدوکسییا(قادین) دؤولتی ایداره ائتمکده چتینلیک چکیردی. اونا گؤره ده بیزانس ایلری(درباری لری) حاکیمیتی داها گوجلو بیر شخصه وئرمگی طلب ائدیردیلر. ائیدوکسییا تورکلرین یوروشلرینین(هوجوم) قارشیسینی آلماغا قادیر اولان، بیزانس تورپاقلارینی قورویا بیلن بیر قهرمان اولارسا، همین قهرمانلا ائولنجیینی (اره گئده‌جیینی) بیل-دیردی و بونونلا دا ایمپراتورلوغون اونا وئریله‌جیینی ائلان ائتدی. بیزانس سرکرده‌سی (کومودان،فرمانده) رومان دیوگئن بو شرطلری قبول ائتدی 1068-جی ایلده ایمپراتور ائلان اولوندو. یئنی ایمپراتور ماکئدونییا، تراکییا و یونانیستاندان علاوه قوووه‌لر توپلادی. بوتون اورتا و باتی آنادولودا الی سیلاح توتان کیشیلر بیرلشدیردی. رومئلیده یاشایان اوغوز و پئچئنگلر ده اوردویا جلب اولوندولار. آرتماقدا اولان تورک اوردوسوندان راحاتسیز اولان بیر سیرا آوروپا دؤولتلری بیزانسا کؤمک گؤندردیلر. دیوگئن نین اوردوسو ارزروم ایستیقامتینده حرکت ائد‌رک مالازگیردی اله کئچیردی.سلجوق قوووه‌لرینین کوماندانی امیر سوندوک بیزانس قوشونلارینا هوجوم ائده رک، اونلاری مغلوب ائتدی. بیزانسین ظفر نیشانی اولان «بؤیوک قیزیل خاچ» حربی قنیمت کیمی اله کئچیریلدی و آلپ آرسلانا گؤندریلدی.

بیزانس قوشونلارینین گونئی قافقازدا، او جومله‌دن آذربایجان ایستیقامتینده هوجوم خبری آلپ آرسلانی سورییادان گئری دؤنمه‌یه مجبور ائتدی. زامان قازانماق و اوردو توپلاماق اوچون آلپ آرسلان بیزانس سارایینا ائلچیلر هئیتینی گؤندره‌رک، اؤز باریش شرطلرینی تکلیف ائتدی. آما دیوگئن بو تکلیفی رد ائتدی. دوشمنین هوجومونون سونوجوندان احتیاط ائدن آلپ آرسلان اؤزو هوجوما کئچمیی قرارا آلدی. مالازگیرد دؤیوشو 1071-جی ایل آوقوستون 26-دا باشلاندی. بیزانس اوردوسونداکی اوغوزلار و پئچنگلر قارشیداکی اوردونون سویداشلاری اولدوغونو آنلاییب سلجوقلارین طرفینه کئچدیلر. دیوگئن اسیر دوشدو. آلپ آرسلان اونو باغیشلادی و 50 ایل سوره جینده صولح موقاویله‌سی باغلادی. موقاویله یه گؤره بیزانس هر ایل سلجوقلارا وئرگی وئرملی، لازیم گلدیکده حربی یاردیم گؤسترملی ایدی. دوغو آنادولو تورپاقلاری تورکلره وئریلدی.

مالازگیرد دؤیوشو دونیا تاریخینده بیر دؤنوش اولدو. بیزانسین و ائرمنی-قورجو فئوداللارینین دوروملاری سارسیلدی. آنادولو همشه‌لیک تورک تورپاغینا چئوریلدی. بیزانسین اساس دایاغی اولان کیچیک آسیانین فتحی بو دؤولتین گوجسوزلمه‌سینده و گله‌جکده داغیلماسیندا بؤیوک رول اوینادی. باغداد خلیفه‌سی بو بؤیوک غلبه موناسیبتیله آلپ آرسلانی «عرب و عجم حؤکمداری»، «موسلمانلارین قورتاریجی سی» و «ایسلامین نورو» آدلاندیردی.