اروجلوق یی

شکر  آللاها قسمت بیزه اولدی  بو سعادت
شوقیله اروجلوق آیین  ائدیک  گنه   رویت
به به نه ‌گؤزل آیدی  بو آی  آیلار  ایچینده
خلاّق   جهان   ایلدی   مخلوقینی   دعوت
 بیرسفره آچیبدی تایین هیچ کس آچابیلمز
سفره نجه  بیر سفره  اتکدن   باشا   نعمت
وار کیمسده   قدرت   سایا  نعمتلرین   آیا؟
ازبسکی تؤکؤب   نعمتینی  صاحب   قدرت
گؤرهانسی آیین قدرتی   واردیرکی، او آیدا
حتی  بشرین  یوخلاماقی  اولسون  عبادت
کامل     یازلیر     دفتر     اعمالینه     قرآن
هرکس تاپا  توفیق   ائده  بیر    آیه  تلاوت
قرآن اوخو  قرآن هامی   بیر   درده دوادی
قرآندی    شفاعت     ائلیین   روز    قیامت
قرآن اوخی،  قرآندان  الؤن  اؤزمه   عزیزیم
قرآن     ائلییر  دؤز   یولا   انسانی  هدایت
تاپشیردی   بیزه   عمرونون   آخر  زمانیندا
عترتله   بو     قرآنی    او  پیغمبر    رحمت
فرمایش     ائدیبدی      گیدرم     دارفنادن
منن سیزه قالسین  بوگوزل بیرجؤت امانت
قرآنیله   عترتدن   الین   اؤزمزسه   هرکس
اوننان اولاجاق هر  ایکی   دنیاده   سعادت

https://www.miyanali.com/pasha-nasiri

https://eitaa.com/ASHAR_PASHA