الویداع سئوگیلیم

الویداع سئوگیلیم، الویداع گولوم،

چالیش اونوداسان اولوب- کئچه نی.

 چولقاییر باغریمی بو گئجه اؤلوم،

 بیر تهر کئچیرسم بو نحس گئجه نی،

 بیر شئعیر یازاجام اونودام سنی.

 ******

 بو سئوگی قانیمی ایچیر کؤنلومدن،

بو قوش قانادلانیب، کؤچور کؤنلومدن،

 "دلی بیر آغلاماق کئچیر کؤنلومدن"،

بیر آن گؤز یاشلاری بوراخسا منی،

 بیر شئعیر یازاجام اونودام سنی.

******

 سئوگینین دادیسان، سؤزون دوزوسان،

 گؤرونور کیمینسه بخت اولدوزوسان،

 من آران اوغلویام، سن داغ قیزیسان،

 گز، دولان داغلاری، دوزو، چمنی،

 بیر شئعیر یازاجام اونودام سنی.

******

خوش بیر گون گؤرمه دیم من بو حیاتدا،

دائم یول ایتیردیم بو ظلماتدا،

 بیر آخشام چاغیندا، گون باتاباتدا،

 داغیدیب باشیمدان دومانی، چنی،

 بیر شئعیر یازاجام اونودام سنی.

 ******

 او غملی کؤکسوندن قوپوب گئدیرم،

 بیر حزین ماهنی یا هوپوب گئدیرم،

 سویوق اللریندن اؤپوب گئدیرم،

 باغیشلا سئوگیلیم، عفو ائله منی،

 بو شئعری یازیرام اونودام سنی.

"رستم فرزانه"