اورمو گؤلونون سورونلاری، دوغال بیر سورجین نتیجه‌سی دئییل

ایرانین رسمی خبر آژانسلاری طرفیندن یایینلانان، ۳۸ مشهور بیلیم آدامی و ۳۲ سیویل توپلوم اؤرگوتو طرفیندن امضالانان بو مکتوبون، اسلامی شورا مجلیسی یؤنتیم قورولونا خطاباً یازیلمیش و بیر اوزو ده رهبرین اوفویسی، مصلحت شوراسی، جمهورباشقانلیغی، چئوره‌نی قوروما قورومو باشقانلیغی، انرژی باخانلیغی و مجلیسین اکینچی‌لیک و انرژی کومیسیونلارینا گؤندریلدیگی بیلدیریلیر.

مکتوبدا دئییلیر کی، اورمو گؤلونون قوروماسیندا "دنگه‌سیز گلیشمه کیمی انسانی مداخله‌لر"، "اورانتیسیز سد تیکینتیلری"، "گؤلون اورتاسیندان چکیلن یول"، "وئریمسیز اکینچیلیگین یاییلماسی و یاسال و یاسال اولمایان قویولارین قازیلماسی" کیمی عامیللر اؤنملی رول اوینامیش و بو پروبلئم، طبیعی بیر سورجین نتیجه‌سینده اورتایا چیخمامیشدیر.

مکتوبدا بئله یازیلیر: "اورمو گؤلونه اطرافدان، اؤرنگین آراز و زاب چایلاریندان سو گتیریلمه‌سی، باشلانغیجداکی بؤیوک ضررلری و سونونداکی بلیرسیز تأثیرلری دقته آلیناراق، بیر چوخ چئوره اوزمانینی قایغیلاندیرمیشدیر. بیز بو قایغیلاری دستکله‌مک و بو کیمی یؤنتملره مخالیفتیمیزی بیلدیرمکله بیرلیکده اینانیریق کی، بؤلگه‌نین اکو سیستمینی هر طرفلی بیر شکیلده دقته آلمایان قرارلار، سورونلاری چؤزه‌بیلمه‌یه‌جک، حتی پروبلملرین چوخالماسینا سبب اولاجاقدیر."

مکتوبو امضالایانلار آیریجا قید ائدیرلر کی، "اورمو گؤلونده اورتایا چیخان سورونلار بیر گونده عمله گلمه‌دیگی کیمی، بیر گونده ده چؤزوله‌بیلمز و تمللی چیخیش یوللاری دوشونولمه‌لیدیر."

مکتوبون داوامیندا بئله یازیلیر:

"یئتکیلی قوروملار، بیربیرلرینی سوچلاماق یئرینه، اؤز یانلیش و قصورلارینی قبول ائتمه‌لی و گرکیرسه، اؤنجه‌کی یانلیش قرارلاری اوزرینه قیرمیزی چیزگی چیزمه جسارتینی گؤسترمه‌لیلر... بیزجه بوگونکو اورتامدا ان گؤزل حادثه، دؤلت، مئدیا، قوروم و قورولوشلار و اوزمانلار آراسیندا دیالوقون قورلماسی‌دیر. بو دیالوقون هدفی ایسه، اورمو گؤلو اوچون بؤلگه‌نین اکوسیستمی، اقتصادی، اجتماعی و طبیعی حیاتی نظره آلیناراق منطیقلی بیر چؤزومون تاپیلماسی‌دیر."