دور! بو قدر چؤکمه اؤزونه اورمو گؤلو!

دور! بو قدر چؤکمه اؤزونه اورمو گؤلو!

«1374 ـ جی گونش ایلیندن ایندی­یه قدر اورمو گؤلو 7 مئتیره یاخین آشاغی ائنیب، 1380ـ جی گونش ایلینین اولرینده 80 مینه یاخین فلامینقو یاشاییردی بو گؤلده ایندی بو فلامینقولاردان بیر جوت ده تاپماق اولماز.

اورمو گؤلونه تؤکولن  21 ایرماق و 39 جیغیر سو یوللارینین قاباغی کسیلیب، 5700 کیلومترلیک(۵۷۰۰۰۰ هکتار) گئنیشلیی اولان بو گؤلون سویو 3000 کیلومتری(۳۰۰۰۰۰ هکتاری) شورانلیغا چئوریلرکن، 60 فاییز آدالاری قوراقلیغا یاپیشیبدیر.

دئییلنره گؤره اوچ ایلدن سونرا دونیانین ایکینجی شور سویونا مالیک اولان اورمو گؤلو، شورانلیغا چئوریله­جک.

دئییرلر هر کس آغ گئیینسه آغ گونه چیخاجاق. آنجاق بیزیم بو گؤزل گلینیمیز، آغ گئیینندن سونرا قارا گونه دوشوبدور. او قدر ایچدییی سولارین یولونو باغلاییبلار کی، داها او  هر درده درمان اولان زیغلارینین اییلنمیش قوخوسونو دا دویماق اولمور. ایندی آذربایجان آشیقلاری بو گؤلون قیراغیندا بایاتی اوخوماغا وردیش ائدیبلر و بو ایناملا یاشاییرلار کی بیر کور اوغلو تاپیلیب، بو گؤزل گلینه اورک وئررکن، بیر ماهنی­ایله اونا یئنی جان باغیشلایاجاق. کور اوغلو گلمه­سه، بو آغ گئییملی گلینین شور باختینا کلمه دئییب آغلامالی­ییق…!»

:: رامین جهانگیرزاده

بیلمیرم هاردان باشلاییم!!! باشیم داشیر بوشلوقلاردان، بوشون بوشلوغونون ندنینی آختاریرام. آرخامدا قالمیش دولو گؤلون، قاباغیمدا بوشلوغونو گؤرورم. رسمینی آراییرام، آراسیندان سیلینمیش 60 فاییزا یاخین آدالارینی، دؤرد یؤنوندن یئنیلمیش سولارین دالغاجیقلارینی، دالغاجیقلارینداکی سسلرینی، سسلرینده­کی هوسلرینی ایزله­ییرم. ایزلرینی تاپا بیلمیرم.

بوراسی اورمو گؤلو! بو گؤلده نه باش وئریب آنلامیرام. آنلامازلارین یوردوندا، آنلاماق بیر آز چیتین اولور. قارا گونه قالمیش آغ گئییملی گلینین گولوشو هر آن قورویور. قوروسو قورویا قاریشیر. قارشیسیندا یئددی باشلی اژدهالارین باشینی گؤروب، باشینی سالیر آشاغی، ائنیر آشاغی. گؤیه چاتماق بیر آز چتین اولور. ایچی، ایچینه دولوب، بورلور. «آرتمیالار»ین سویقیریمینا دؤزه بیلمیر. دوزلاقلارین ایچینه باتیر. آغ یاشماغینی اوزونه چیکیب، چؤکور اؤزونده. دوزولور دوزلاقلار دوزنلیینده.

دولوب بوشالیرام ایچینده­کی شورانلیقلاردا. شررینی باشلاریندان ائدنلر، سنی بوشاماق ایسته­ییرلر حیاتدان. سنی صحرایا چئوریب، سنده دوه بئجرتمک ایسته­ییرلر دوه­بئیین­لر. دور! سؤزو سؤزدن آل، آلنینی آچ، دوه­بئیین­لر صحرایا چئوریلدیینی گؤروب سئوینه­جکلر. یامسیلایاجاقلار سنی دوه­لر. کاروانلارین زیقیرولو سسلریندن اوینایاجاق کار قولئیبانی­لار.

دور بو قدر چؤکمه اؤزونه اورمو گؤلو! گولوشونو قوروتماق ایسته­ینلری اؤزونده بوغ، اؤزونو یئنی­دن دوغ! دوغولماق هر آن حیاتا قاییتماقدیر. قاییت اؤزونه! ایزله اؤزونو! آدینی دامغالا دالغالارینا. داغلارین آرخاسیندان اوچا ـ اوچا یئنه ده گلسینلر «فلامینقو»لار. قونسونلار اوره­یینه، سسلرینی سالسینلار سسینه. سسین سسلرینه قاریشسین.

دور آذربایجانین گؤزل گلینی اورمو گؤلو! دور «بحر­المیت» اوردوندا و «سالت­لیک» آمریکادا یئنه ده سنه قیسقانسینلار.