سونجوق (طنز)

سونجوق

رامین جهانگیرزاده

مینقیلداماقدان اؤنجه بونو آرتیرمالییام کی 1300 قدیم­ده اوندا کی دده­م ـ بابالاریمیز دوه­ ایله سفره گئدیردی، قاغابالالارین بیری بولود اولوب شیمشمک چاخارکن مورادینا چاتماق ایسته­ییردی. یاخچی یادینیزدا اولسا بولودون قیچی ـ قیچینا دولاشدی سونرا زامان فیشک کیمی سووشدو ماشینلار گؤیدن یئره قوندو. یازیق مورادی دا ماشین ووردو. آدینی چکدییم بو قاغابالا نه بولود اولا بیلدی نه ده کی مورادینا چاتا بیلدی.

ایندی بو یازیق قاغابالا آرزوسونا چاتمادیغی اوچون، کؤهنه ته­یر کیمی دؤور گؤتوروب اؤز باشینا فیرلانارکن، توستو بوراخیر. هردن ده تپیک چالیب، سونجوق آتیر، سونجوغو بوشا کئچیر.

او دئییر چاغداش ادبیاتیمزدا بوشلوقلاری دولدورماق اوچون بعضن تپیک چالیب، سونجوق آتمالیییق. منجه اونون سونجوق آتما طرزی­نین بیر آز آخساقلیغی وار. سونجوق آتاندا گرک ساغ ـ سولو و اورتانی نظرده آلمالییق. سونجوغون هارا ده­یدییینی و اوندا اولان ائستاتیکانی آنلامالیییق، اگر سونجوقدا اولان ائستاتیکانی دوزگون باشا دوشمه­سک، دئموکراتیانی دوزگون آنلایا بیلمه­ریک. سول طرفه سونجوق آتساق ساغ قیچیمیزا قارا سو گله­جک. ساغ طرفه سونجوق آتساق سول قیچیمیز آخسایاجاق. یاخشی سی اودور کی دوز اورتایا سونجوق آتاق. هر نه اورتادا باش وئریر. اورتا بیر پاندول کیمی عمل ائدیر. اورتایا ده­ین سونجوغون ضربه­سی تعادول یارادیر.

هر حالدا بیز سونجوق آتمانین نئجه اولدوغونو سیزه گؤستردیک البتده کی منقیدچی بئله اولمالی­دیر، یوخسا سونجوقلار اونون قارنینا ده­یر. قارنینا سانجی دولار سفئهله­ییب مینقیلدایار.

ننه­مین دوستو ماگاندانانانین خالا­سی قیزینین دایی­سی اوغلونون آروادی آناشین قیزی سؤیلو بو باره ده­ بئله سؤیله­ییردی:

ـ بیزیم کور ائششه­ییمیز هارا گلیردی سونجوق آتیردی. من اونون سونجوقلارینا چوخ دیقت ائتدیم. اونون سونجوغوندا اولان آنارشیستی حرکتلر  منی چوخ سارسیتدی. من بو سارسینتی­لار ایچیندن باش قالدیریب، گؤیه باخدیم. گؤیده بولودلارین سونجوق آتماغینی گؤروب تعججوبلندیم. عمیم موراد بیردن بیره منی سسله­دی:

 ـ آ قیز سؤیلو بیر ساعاتدی سنی چاغیریرام، گؤزونو گؤیه زیلله­ییبسن.. او مئرته قالمیش چلیییمی وئر منه! تئز اول گئدک گؤی قارالیب ایندی یاغیش یاغار ائششک پالچیغا باتار، گئده بیلمه­ریک.

من موراد عمیمین سسینی ائشیدن کیمی دیک آتیلدیم. کور ائششه­ییمیزین سونجوغو دوز گؤزومون آلتیندا ده­یدی. گؤیده بولودلار قارالان کیمی منیم ده گؤزومون آلتی قارالدی. من آغلادیم گؤی آغلادی. گؤی آغلادی من آغلادیم. ائششکله بولودون اوخشارلیغینی آنلادیم. موراد عمیم دویونجاق گولوب منه اورک وئردی.

سونجوقلارین اوخشارلیغی اولسا دا، آنجاق ایچ دونیالاری اونلاری بیر ـ بیریله فرقلندیریر. سونجوقلارین ایچینده اولان قووه­لر اونلاردا اولان ایچ کاراکتئرینی گؤستریر.

هر کیمسه و یاخود هر نه سه سونجوق آتیر اونون سونجوق آتماسی اونون ایچینده اولان سیاسی آنلاملاری دا گؤستریر. سونجوق آتان سونجوغو کیمی یاشامالیدیر.

مودئرنیته­نین اوجباتیندان سونجوغون نه اولدوغونو بعضی­لری دریندن دوشونه بیلمیر. اؤزو بیلمه­دن سونجوق آتیب سونجوغو سونجوقلا دؤیه­شده­ییر. هر حالدا او دوشونمه­دییی ایچینده­کی سونجوقلاری اؤزوندن مودافیعه ائتمک اوچون ایشله­دیر. سونجوق آتیر سونجوقلارا قارشی.

اخلاقی باخیمدان سونجوقدا اولان اخلاقسیزلیقلار اونون کیم و نئجه­ایشلتمه­ییندن آسیلی­دیر. سونجوغو دوزگون آنلامایان و اوندا اولان ایچ قووه­نی دوزگون باشا دوشمه­ین دوزگون ایشله­ده بیلمز.

بعضن قاریشقالار دا ایشلری پیرتلاشیق دوشنده شیللاق آتیرلار. شیللاق سونجوغون موکمللشمیش آیری بیر اوزودور. قاریشقالار دوه­یه شیللاق آتاندا سونجوغون نه اولدوغونو آنلاییب سونرا شیللاق آتیرلار.

قاریشقلار پوست مودئرن دوشونجه­نی مودئرن بیر فضادا یاراتماق ایسته­ییرلر. قاریشقالارین دا اؤزونه گؤره قاغابالالاری و قاغالاری اولور. هر حالدا قاریشقالارین دا قاغابالالاری بولود اولوب مورادلارینا چاتماق ایسته­ینده سونجوق آتماغی اونوتمورلار.

سونجوق آتماغی سیز ده اونوتمایین. هر نه سونجوغا باغلی­دیر…