هئچ قیملاری دا قیمیلدامادی قارین اوتاران قارینپالارین

هئچ قیملاری دا قیمیلدامادی قارین اوتاران قارینپالارین

گوللری تورپاق آلدی

یئنه گؤزلر قارالدی

اؤلمه­دین، اؤلدوردولر

سنی درده کیم سالدی

رامین جهانگیرزاده

آذربایجان آغلادی، آغی بوزونا قاریشدی. قان قوسدو پالچیق دیوارلار. دیدرگین دوشدو سومویو اتینده. اللری جوجردی، دئپرئملرین آلتیندان. آلنی چاپیلدی، چیلیمچیلپاق اولدو گؤوده­سی. گورولده­دی ایچینده ایچی. هئچ قیملاری دا قیمیلدامادی قارین اوتاران قارینپالارین. قارینلارییلا تبیل چالیب، چؤزگوردولر ایشیق صحیفه­لرینده.  

صیفتینی اونوتدولار. صیفتیندن بویلانیب، بوی آتدین تانرییا قدر. قانینلا چکدین شکلینی بولودلارین اوستونه، اوستوندن گونش کئچدی. اوچدو، اوچولدوغون یئرلردن قانلی گؤیرچینلر. چین ـ چین اولدو کدرلرین. کوره­لندی گؤزلرینده اود. اودلاندی دیلینده سؤزلرین. سنه باخمادیلار مال بئیین کورامال بامبیلی­لار. باخمامازلیغا ووردولار اؤزلرینی. سؤزلرین یئتیم دوشدو، دیشلرینی بیر ـ بیرینه سورتوب، باسدیردین اؤزونو، اؤزون آغلادین. اؤزونده گؤزون آغلادی، اوخودو:

«دونیا ائله کیچیکدیرکی،

بیر یئتیمه یاشاماغا یئری یوخدور.

دونیا ائله بؤیوکدورکی،

آداملاری باسدیریریق نئچه واختدیر.»#

ـ صیفتیمه باخ! باخ! بو قان سنه قنیم اولوب، بوغاجاق، بوتون چیرکین هئیکلینی. هورمه یالان اویدورمالارینی، اویما دردلریمی تورپاقدا اویوموش چاغیمدا. چیلیمچیلپاق اولسامدا، هؤروکلریم تورپاق آلتیندا قالسا دا، قلبیم هله دؤیونور. سفیلجه­سینه سوسوب باغیرتیلاریمی ائشیتمه­سن ده، باخ بو منم بیر بدن، پالچیق دیوار آلتیندا قالان آذربایجان. آیاغا قالخیب، یارالاریمی باغلایاجام. بو بیرینجی و سونونجو یارام دئییل. دئپرئملرین قییناغیندان قوپوب، قیریلاجام باشیندان. اوندا بیلرسن باشسیز بدن نه اولار؟!!ـ دئدین کورامال مال بئیین بامبیلی­لارا.

اتک یازی:

-------------------------------------------

#آقشین یئنی سئی