سوء قصد

سوء قصد


جانیما قصد ائتدیلر
هاچا دیشلی بیر کیشی
قول – قیچیمی باغلاییب،
منی دوغراماغا باشلادی…!؛
قولاغیمی، بورنومو کسیب،
ساققیز کیمی چئینه¬دی…!
دریمی سویوب
اوتوردو اوستونده
قوللاریمی اوزوب
دمیر گولدانا اکدی
اؤز قانیملا سوواردی
قیچلاریمی کسیب چلیک دوزلتدی
دیشلریمی چیخاردیب
تسبئح جورلادی…
تسبئحله ایستیخاره ائتدی!
ایستیخاره¬سی دوز چیخدی
یئنه ایشینه داوام ائتدی
بیر آز نفسینی درندن سونرا
یئنه تسبئحله ایستیخاره ائتدی
ایستخاره¬سی دوز چیخدی
یئنه ده ایشینه داوام ائتدی
باشیمی کسیب توپ اویناماغا باشلادی باشیملا…
آیاغینین اوستونده اویناتدی
سایدی:ـ
بیر
ایکی
اوچ
دؤرد
بئش
آلتی
باشیم توپوغونا ده¬ییب سول طرفه دیغیرلاندی
بیر نئچه آددیم دالی قاییدیب
تورپاغین اوستونده دیغیرلانان باشیما
اولان گوجو ایله تپیک چالدی
باشیم قورو چینار آغاجینین بوداقلارینا ایلیشدی
سینه¬می یاریب،
اوره¬ییمی چیخارتدی
اوره¬ییم بالیق کیمی
الیندن زویودو
ماوی گؤلون ایچینه دوشدو
چینار آغاجینین بوداقلارینا ایلیشن باشیم
قاققیلدادی
هاچا دیشلی کیشی¬ دلی اولدو
آغاجا بیر تپیک
ایکی تپیک
آمما باشیم دوشمه¬دی بوداغیندان
یئردن داش گؤتوروب
داشلادی باشیمی
بیرینجی داش ساغ گؤزومه
ایکینجی داش سول گؤزومه ده¬یدی
گؤزلریم پیرتلادی، چیخدی یئریندن
هاچا دیشلی کیشی یئنه باشلادی داشلاماغا
بیر داش
ایکی داش
اوچونجو داشدا باشیم دوشدو بوداقدان
قاققیلدایان دوداقلاریمی خینجیم – خینجیم ائله¬دی
دیلیمی کؤکوندن چیخارتدی
ماوی گؤلون ایچینه دوشن اوره¬ییم
هاچا دیشلی کیشی¬نی اله سالارکن
ـ لالای لای لالالای ـ اوخویا اوخویا
بئلی اوسته اوزوردو…