اوچ قیسا شعر

 

چینار

 

رامین جهانگیرزاده

 

1

شعرلریم گونو ـ گوندن گوده­لیر

شعرلریمدن کپنکلر اوچوب گئدیرلر

شعرلریمدن قارانقوشلار کؤچورلر

نه یامان قار یاغیر شعرلریمه

شعرلریم قارین آلتیندا قالیر

شعرلریم قار آدامینا چئوریلیر

 

2

باشیمی گؤیه توتورام

بولودلار باشیمین اوستونده

گؤزلریم یاغیر

کؤینه­ییم ایسلانیر

قیچلاریم باتیر تورپاغا

من صاباح بیر چینار آغاجی اولاجاغام

 

 

3

تانری اویاقدیر

من یاتمیشام

بیر کلمه دوشور آلنیما

دیک آتیلیرام

اویانیرام

بیر کلمه دانیشیر منیمله

«اناالحق»

گونشی دوغراییرلار

بیر دیلیم منه چاتیر

گون باتان چاغی

من باتیرام

گونش یئنه ده دوغولور شرقدن