قاسیملارین قاسیمی

قاسیملارین قاسیمی

 :: رامین جهانگیرزاده

ایلغیملاردا یاشایان قاسیملار، قاسیرغا قوپارتماغا باشلادیلار. قاسیملارین قاسیمی قاسناق ووردو. چرتکه­لر قاسیملارین قاسیمی­نین قاسناغینا قونوب، قیدیقلادیلار. قاسیملارین قاسیمی­نین قیمی دا قیمیلدامادی. حالوا قاسیم قوندو چرتکه­لرین قانادینا، قاناتدی چرتکله­لرین قانادینی. قانان اولمادی، قیرها قیر دوشدو، قاسیملار یوردوندا. یاریم قاسیم بوتؤی قاسیما پاچا گلدی. قاسیملار پیچیلداشدیلار. داش قاسیم تئشه­سینی یئره قویوب داشلاری سیندیرماقدان ال چکدی. چاققال قاسیم قارغا قاسیما ـ «بوغازینی اوزرم»ـ دئدی. قارغا قاسیم چاققال قاسیما زورو چاتمادیغی اوچون، قیرچی قاسیما قاریلدادی. قیرچی قاسیم قیرغی قاسیما زاریلدادی. قیرغی قاسیم گؤیدن یئره قونوب، قارغا قاسیمی قاتدی قاباغینا. قابلامانی تولازلادی باشینا.  

قوش قاسیم آلما آغاجینین بوداقلارینا قوندو، اللرینی آلنینا توتدو، بویلانیب باخدی، گولدو اونلارا. بویو بویوندان سوزولوب، دوشدو باغی قاچمیش شالوارینا. قوش قاسیمین شالوارینین بندی قاچاندان بری هر نه ده­ییشدی. شول قاسیمین شالواری اوراسیندان سوروشدو. شر قاسیم بو احوالاتی ائشیدندن سونرا، شوربا قاسیمی یوللادی قاسیم خانین یانینا. یانینی قاشییان قاسیم خان، شوربا قاسیمی گؤروب شر قاسیمی یامانلادی. شوربا قاسیم قاسیم بیر کاسا شوربا سویونو توتدو قویدو قاسیم خانین قاباغینا. سونرا باشلادی شوربالاماغا. مال قاسیم، مال مئیدانیندا مال ساتاندا میرتلادی. قارا قاسیم آغ کؤینه­یینی اوتوله­ییب، گئیندن سونرا گئتدی آغ قاسیم گیله. آغ قاسیم قارا قاسیمی گؤرجک قارا کؤینه­یینی گئیدی. سونرا یولا دوشوب گئتدیلر قویون اوتارماغا. آغ قویونلاری قارا قاسیم اوتاردی، قارا قویونلاری آغ قاسیم.  میرزه قاسیم قلمی­نی گؤتوروب، هر نه­یی یازدی. یانینا گلدی قاسیم خانین آدامی. ـ من قاسیم خانین آدامی­یام ـ دئدی. میرزه قاسیم گؤزلویونون اوستوندن باخدی اونون گؤزولویونون آلیتینا.

میرزه قاسیم دئدی ـ دئنن من اؤلوم قاسیم خانین آدامییام!

قاسیم خانین آدامی دئدی: ـ اؤزوم اؤلوم  قاسیم خانین آدامییام!

میرزه قاسیم دئدی: دئنن ایمان حاققی قاسیم خانین آدامییام!

قاسیم خانین آدامی دئدی:  ایمان حاققی قاسیم خانین آدامییام!

میرزه قاسیم یانینداکی باجی اوغلوسو ایمانا باخیب گولومسه­یه­رک دئدی: «دئنن حضرتابباس حاققی قاسیم خانین آدامییام!»

قاسیم خانین آدامی دئدی: «حضرتابباس حاققی قاسیم خانین آدامییام!»

میرزه قاسیم گؤزلویونو گؤتوروب بوینونو اه­ییب آشاغی دئدی: «اوندا گه مین بوینوما!»

قاسیم خانین آدامی میندی میرزه قاسیمین بوینونا. میرزه قاسیمین بوینو ایشدن دوشدو. قاسیملارین قاسیمی قارا نفس اولدو… میرزه قاسیمین قارا نفس اولدوغو قاسیملارین قولاغینا یئتیشدی. قاسیملارین هامیسی ییغیشدیلار بیر یئره سونرا گلدیلر میرزه قاسیم گیله، ییغیشدیلار باشینا…

حالوا قاسیم میرزه قاسیما بیر تیکه قوم حالواسی توتوب دئدی: «یئ میرزه! هئچ اولماسا بو قوم حالواسیندان بیر تیکه یئ سنکی یازماقدان ساوایی هئچ بیر شئی گؤرمه­دین بو دونیادا! سنی بو گونه سالانین حالواسینی یئییم.»

یاریم قاسیم قاسیملارین قیچلارینین آراسیندان کئچیب میرزه قاسیمی قوجاقلاییب دئدی: «سنی یاری جان ائله­یه­نین بوتؤی جانی چیخسین! یاریم جانیم سنه قوربان دور آیاغا میرزه!»

بوتؤی قاسیم یاریم قاسیمین قولتوغوندان یاپیشیب قیراغا چکدی سونرا میرزه­نین باشی اوسته دایانیب دئدی: «سنی بو گونه سالانی یاریمچیلیق قالسین، پارا اولسون هر نه­یی!»

داش قاسیم تئشه­سینی میرزه قاسیمین یانینا قویوب دئدی: «آی سنی داشا دؤنه­سن میرزه­نی بو گونه سالان!»

چاققال قاسیم بوغازینی اوزادیب دئدی: «آند اولسون قارغا قاسیمین جانینا بوغازینی اوزه­رم سنی بو گونه قویانی!»

قارغا قاسیم قیرچی قاسیمین باشینا چیغیریب دئدی: «قارا گونه قالاسان، قیرچی کؤکونده اولاسان سنی، میرزه­نی بو گونه سالان!»

قیرچی قاسیم قارغا قاسیمدان بیر آز چکینیب، قیرغی قاسیما اوزونو چئویریب دئدی: «قیرقازانیندا یاناسان میرزه نی بو گونـ…»

قیرغی قاسیم قیرچی قاسیمین سؤزونو کسیب، شیغیدی میرزه­نین اوستونه سونرا دئدی: «گؤزلرینی چیخارداجام، بئینینی دئشه­جم! ائله بیلیرلر میرزه آدامسیزدیر!»

قوش قاسیم آغاجین بوداغیندان دوشوب، شالوارینین باغینی باغلاییب گولومسه­یه­رک دئدی: «چکیلین اویانا گؤروم میرزه­یه نه اولوب؟!!»

هامی چکیلدی قوش قاسیم قولاقلارینی میرزه قاسیمین قلبینه سؤیکه­ییب دئدی: «های کوی سالمایین هله قلبی وورور، بیر آز قارا نفس اولوب!»

قوش قاسیم میرزه قاسیمین احوالاتینا باخمایاراق، اوزونو توتوب قاسیملارا دئدی: «حؤرمتلی و عزیز قاسیملار قاسیم خان قیزینی منه وئرسه­یدی هئچ واخت میرزه­نین باشینا بئله بیر اویون گلمزدی! من بیلیردیم کی بئله اولاجاق»

شول قاسیم شالوارینین چکیب، قوش قاسیما دئدی: «اشی سن نه هایدا بیز نه هایدا!»

شر قاسیم بیچاغینی چکیب، قوش قاسیما دئدی: «ایه قوش بالا  قانادلارینی کسه­رم ها! نه قیز نه خان؟!!»

شوربا قاسیم اللرینی اللرینه سورتدو، گولومسه­ییب دئدی: «حؤرمتلی شر قاسیم قوش قاسیم بیر قلتدی ائله­ییب اؤز بؤیوکلویونوزه گؤره باغیشلایین!»

مال قاسیم میرتلایا ـ میرتلایا دئدی: «کئچی جانینی حاییندا… قوش قاسیم نه هایدا؟!!…»

قارا قاسیم آغ کؤینه­یینین یاخاسینی دوزلدیب، دئدی: «هردن بیردن آغ قویونلارین بعضی سی ده قارا نفس اولور. میرزه­نین گونونه دوشور. بورنوندان قان آچیلسا دوزه­لر.»

آغ قاسیم قاسیملارا اوزونو توتوب دئدی: «قارا قاسیم دوز دئییر چکیلین من بو ایشی حل ائدیم.»

آغ قاسیم میرزه قاسیمین بورنونا بیر چیرتما وورارکن، میرزه­نین بورنوندان قا آچیلدی.غ میرزه قاسیم بیر آز هوشا گلیب آییلدی. باشینین اوستونده بوتون قاسیملاری گؤروب یئنه ده حالدان گئتدی…