آجیغا سئوگی (تیکانلی یاشاییش، تیکانلی اؤلوم)

سیغین کولونداکی تیکانا گولوم

او سنی ال لردن قورویاجاقدیر

تیکانی اؤزویله دوغولان بئله

اؤزو تیکانییلا قاریاجاغدیر

حایاتدا آجی لیق گرکمیش سنه

ایل لری اوزو آغ یاشاماق اوچون

تیکانین دوزوموش، چؤرکمیش سنه

یاشاییش یوکونو داشیماق اوچون

گؤرو آجیغینی قاش قاباغینی

ایلان زه هرینی قورویان کیمین

اَییلن گؤرمه ییم ووقار داغینی

آغاج آیاق اوسته قورویان کیمین

قوی گؤزلرینده ده تیکانلار بیتسین!

سنی قارا اللر هده لییه جک

ووقارین غیرتین دادینا یئتسین

آلچالیب یاشایان گده لییه جک

یاشا اؤزون اوچون، اوزو آغ یاشا

من سنین قیشیندا اودام، اوجاغام

یاییندا، ایستینده دؤنه جم قیشا

یاغیش یاغاجام، قار یاغاجاغام

گولون گوللویونو باشا دوشن یوخ

سیغین نیفره تیه، سیغین آ گولوم

باخ! بئله چاغلاردا یاراشیر سنه

تیکانلی یاشاییش، تیکانلی اؤلوم