پیامیم منیم، آبباس بارز

ایل سون نفسلرین بو چکن زامان

وار بویوک خلقیمه سلامیم منیم

سوزومده آجی سا، دیلیمده آجی

خلقیمه شیریندیر پیامیم منیم

آزادلیق آرزیسی اءدیرم خلقه

اوزوموزه گلن بو یءنی ایلده

اینسالیق، دوزگونلوک، بیرده آزادلیق

بونلادیر اءللره پیامیم منیم

هدفیم آیدین دیر، دیله ییم آیدین

دوشونجه م- احساسیم اوره گیم آیدین

خلقیمه وءردیگیم امه گیم آیدین

حالالدان آیریلیب حارامیم منیم

بیرلیک تک آرخام وار،دوزلوک تک اءلیم

"جیغاتی" چایی تک داشقین دیر سءلیم

تیکیلسه آغزیمدا، باغلانماز دیلیم

"بابک" مرامی دیر مرامیم منیم

مظففر خلقیمین حءیرانییام من

عزیز وطنیمین قوربانییان من

حققین عدالتین دیوانییام من

حققه یول آچاجاق قییامیم منیم

خلقی سعادته چاغیریر دیلیم

وارلیق آغاجیندان بودور حاصیلیم

غلبه ایلی دیر بو یءنی ایلیم

بءله نیشان وءریر نیظامیم منیم

"بارز" من سویله ییم، سنده بیر بیر یاز

اوره گیم دنیز دیر، گوز یاشیم آراز

اومودلو بیر یازدیر، سونبوللو بیر یاز

بو یازدا آرتاجاق داوامیم منیم

اءلیمیزین قوجامان شاعیری، رحمتلیک "آبباس بارز"