بایقوش و تاووس قوشو / عزیز محسنی

بایقوش و تاووس قوشو / عزیز محسنی

دئـییله‌نه گؤره،‌حضرت-ی سولئـیمان پئـیغمبر تاووس آدلی گؤزل بیر قـیزا عاشیق اولموشدو. نه قده‌ر الـله‌شیردی, تاووس اونا اره گئتمه‌یه راضی اولموردو. آخیردا سولئیـمان بو قرارا گلدی کی، تاووسو زور ایله آلیب گتیرسین. تاووس بونو آنلادی و سولئیـمان پئیغمبره اؤز ایسته‌یینی بیلدیردی:

- گره‌ک قوش دیمدیییندن بیر بؤیوک عیمارت تیکیلسین، آیاغی دنیزدن یاشالسین، باشی بولوددان. او زامان من سنه گله‌رم و منی توی ائدیب ائوینه آپارا بیلرسن.

سولئـیمان پئـیغمبر بو شرطه راضی اولدو. بو فیکره گلدی دونیادا اولان بوتون قوشلاری بیر یـئره یـیغسین، هامیسینی اؤلدورسون و اونلارین دیمدیک‌لریندن تاووس ایسته‌ین عیمارتی تیکدیرسین. سولئـیمانـین بونا حاققئ چاتـیردی، اونا گؤره او بوتون قوشلارین پادشاهی ایدی. بلی, امر وئردی قوشلارین هامیسی‌نی یـیغدی اؤز بارگاهینـین قارشی‌سینا. سولئـیمان پئـیغمبر باخیب گؤردو کی، تکجه یاپالاق (بایقوش) گلمه‌ییب. وزیر- وکیلی گؤنده‌ردی کی، اونو دا گتیرسین‌لر. یاپالاق وزیر- وکیله دئدی:

- من آخماق پادشاهین یانـینا گئتمه‌رم، اؤزوم ده «بی » قوشام.

وزیر- وکیل سولئـیمانا خبر آپاردیلار کی، یاپالاق دئـییر: من آخماق پادشاهین یانـینا گئتمه‌رم، اؤزوم ده «بئی» قوشام.سولئـیمان هیرسله‌نیب اؤزو گـئتدی.

یاپالاق اونا دئدی:

- بیر ساآتلیق اوچون پادشاهلیغی منه وئر گلیم، یوخسا گلمه‌یه‌جه‌یم. اؤزومو ده قوشلارین بیی ائت.

سولئیمان ناچارلیقدان راضی اولدو. بایقوش اونونلا گلدی، سولئیمان بیر ساآتلیق اوچون پادشاهلیغی اونا وئردی، اؤزونو ده قوشلارین بیی ائـتدی. بایقوش تاختا چیخیب دئدی:

- آی شاه بیر قـیزا گؤره، بوتون قوشلاری اؤلدوروب، نسلینی کسمک‌می اولار؟ من قوش دیمدیییندن سنه تاووس دئدییی عیمارتی تیکه‌رم.

بایقوش امر ائتدی، هر قوش دیمدییینین اوجوندان بیرآز کسیب بیر یـئره توپلادی، بؤیوک بیر داغ یاراتدئ. سولئـیمان پئـیغمبر, تاووس دئدییی عیمارت‌دن ده گؤزل بیر ائو تیکدی.

بایقوشا دا دئدی:

- سن ائله بی‎لییه  لایـیق قوش‌سان، سنین آدینی «بای-قوش» قویورام و اؤزومه وزیر سئچیرم.

بو زاماندان اونون آدی بایقوش قالدی.

بلی،‌ سولئـیمان پئـیغمبر قـیرخ گون- قـیرخ گئجه توی ائتدی. تاووسو تیکدیردییی ائوه گتیردی. هر گون تاووس بزه‌نیردی، دوزه‌نیردی، اؤز گؤزه‌للییی ایله فخر ائدیردی.

« آی تانری، گؤره‌سن دونیادا منیم کیمی ده گؤزل وارمی؟» دئییردی، باشینی چئویریب آیاغینا باخاندا اوتانـیردی. چونکی آیاقلاری چیرکین ایدی. او همیشه آیاقلارینی سولئیـمان پئـیغمبردن گیزله‌دیردی. گونلرین بیر گونونده سولئـیمان پئـیغمبر اونا دئدی:

- بیلمیر‌م نه اوچون آیاقلارینی مندن گیزله‌دیرسن؟ منیم یانـیمدا سویونمورسان.

تاووس سؤز تاپیب دئیه بیلمه‌دی. دئدی:

- دوز دئییرسن.

تاووس او بیری اوتاغا گئتدی، بزه‌ندی، دوزه‌ندی:

- ایلاهی،گؤره‌سن دونیادا منیم کیمی ده گؤزل وارمی؟ دئدی.

آیاقلارینا بیر ده باخدی اوتاندی. بو آیاقلا سولئـیمان پئـیغمبرین یانـینا گئتمک ایسته‌میردی. اوزونو گؤیه توتوب یالواردی :

- آی آللاه منی بیر قوش ائت.

آللاه اونون یالواریشینی ائشیتدی، اونو بیر قوش ائتدی. تاووس قوشو اوچوب قاپی‌دان چیخدی. سولئـیمان پئـیغمبر دئدییی سؤزه پئشمان اولدو.

ایندی تاووس قوشو قاناد چالیر، اوچور، اؤز گؤزه‌للییی ایله فخر ائدیر، آمما آیاقلارینا باخاندا اوتانـیر.

قایناق: www.Azelbilimi.com