هر سؤزون افسانه ایمیش

منی آنلاتما کی عشق ، عالمی – سئودا نه ایمیش ؟

بیلیرم من سنی ، گئت ! هر سؤزون افسانه ایمیش .

گئت ، گولوم ، گئت گؤزلیم ! باشقا بیر عاشیق آرا ، بول !

دویدوم آرتیق سنین عشقینده کی معنا نه ایمیش ! ..

بی وفاسان ، ملک اولسان بئله اویمام داها ، گئت !

کیم کی ، اویموش سنه ، کونلوم کیمی دیوانه ایمیش .

یئتیشیر ، گئت ! منی قهر ائیله مه ، ترسا قیزی ، گئت !

آنلادیق شفقتلی – آیینی مسیحا نه ایمیش !

سنی بیر ساده دیل ، آزاده ملک سانمیش ایدیم ،

نئیله ییم ! .. آه .. کؤنول روحونا بیگانه ایمیش .

سنی تقدیس ائدرک بیر داها سئومم اصلا ،

نه ایمیش سانکی بو عشق ! ؟ عاشقی – شئیدا  نه ایمیش !

عالمی – ذؤوقو صفادن منه بحث ائتمه ، ساقین !

بیلدیک آرتیق بو جهان ملکو نه ویرانه ایمیش !