درباره من

آتیل -ماتیل چرشنبه!

بایرام ایدی، گئجه قوشی ، اوخوردی،                      
آداخلی قیز بی جورابین توخوردی،
هر کس شالین بیر باجادان سوخوردی،

آی نه گوزل قایدادی شال ساللاماق،
بی شالینا بایراملیغین باغلاماق.
                                                                               
                
شال ایسته دیم من ده ائوده آغلادیم،  
بیر شال آلیب ، تئز بئلیمه باغلادیم،
غلام گیله قاشدیم ، شالی ساللادیم ،

فاطما خالا منه جوراب باغلادی،
خان ننه می یادا سالیب آغلادی.

حیدر بابا، ( میرزممدین ) باخچاسی،
باخچالارین تورشا شیرین آلچاسی،
گلینلرین دوزمه لری ، تاخچاسی،

هئی دوزولر گوزلریمین رفینده،
خئیمه وورار خاطیره لر صفینده.

بایرام اولوب ، قیزیل پالچیق ازللر،
ناققیش ووروب ، اوتاقلاری بزللر،
طاقچالارا دوزمه لری دوزللر،

قیز- گلینین فیندیقچاسی ، حناسی،
هوسلنر آناسی ، قایناناسی.

باکیچی نین سوزی- سووی، کاغیذی،
اینکلرین بولاماسی، آغیزی،
چرشنبه نین گیرده کانی، مویزی،

قیزلار دئیر: آتیل-ماتیل چرشنبه،
آینا تکین بختیم آچیل چرشنبه!

یومورتانی، گویچک ، گوللی بویاردیق،
چاققیشدیریب، سینانلارین سویاردیق،
اویناماقدان بیرجه مگر دویاردیق؟

علی منه یاشیل آشیق وئرردی،
ایرضا منه نوروز گولی درردی.


چرشنبه گونی جینابلارینیزا قوتلو اولسون


 

درج شده در تاریخ ۹۵/۱۲/۲۴ ساعت 16:20

کاربران آنلاین (1)

مریم یعقوبی