اقام حسین {شعر ترکی}

السلام علیک یا اباعبدالله الحسین

فاطیمه نون اوغلودی  سلطانیمیز

جانینه   قربان   اولونا   جانیمیز

فاطیمه نون اوغلودی حاجت ورن

شیعه لره حکم شفاعت ورن

فاطیمه نون اوغلودی درمان ورن

سائله لطف ایلیب احسان ورن

فاطیمه نون اوغلی اولوب نور عین

جانم حسین جانم حسین جان حسین

جانلارا جاناندی دنن یا حسین

دردلره درماندی دنن یا حسین

دیللره محرمدی دنن یا حسین

شاه محرمدی دنن یا حسین

بیکسه یاوردی دنن یا حسین

عالمه دلبردی دنن یا حسین

قویما فرشته سنی دیلدن سالا

یار آدین سویلیه سبقت آلا

گویده ملک دلبری وصف ایلیور

دائم حسینون آدینی سویلیور

دائما اظهار ائلیور جان حسین

قانه باتان جسمووه قربان حسین

سن اوجادان سویله دنن یا حسین

ناله عشق ایله دنن یا حسین

عاشقون البته اولار غیرتی

قویماز الیین گئده تا فرصتی

 

حسین دنن قلبووی سن زار ائله

حسین آدین سن ائله اظهار ائله

لبلرووه تا ملک اولسون دخیل

لبلرووه بوسه ورا جبرئیل

حسین آدی معنوی نیرو اولار

حسین دئسون آقزوندا خوش بو اولار

دنن حسین سنسن آقا رهبریم

مشگلدیم اول سن ئوزون یاوریم

سنی حسین باب رجا بیلمیشم

دوت الیمی من قاپووا گلمیشم

ای کسیلن اللری مشگل گشا

سن بیل آنون حاجتیمی ور آقا

قویما اولام زار و پریشان حسین

ایله ئوزون دردیمه درمان حسین

دوزدی قاپوندا آقا نالایقم

قوما قاپونان سنه من عاشیقم

عاشقووم شیونه اورگنمیشم

اینان حسین من سنه اورگنمیشم

مطمئن اول ای غمی چوخ حسینچی

غیر از حسین یاوری یوخ حسینچی

چشمه احسان حسین آخاجاق

قورخما حسین آخر سنه باخاجاق

حسین علی تک بیکسه باخاندی

عینا خانم فاطیمه ؛مهرباندی

حسین بیزی ئوز سمتینه چکیبدی

اورگلره محبتین اکیبدی

حسین اولوب شرافتون شهیدی

عدالت و و لایتون شهیدی

اگمدی باش یزیده اولدی شهید

خوار اولوب پست اولوبدور یزید

کرب و بلاده شه دوران حسین

ائتدی علی حقینی اعلان حسین

باتدی قانا یکسره یولداشلاری

وردی جانن عشقیله قارداشلاری

دوتمادی طوی اوغلی علی اکبره

اکبرینون پیکری دوشدی یره

دگدی سه پر تشنه علی اصغره

سپدی قانن مظلوم آقام گویلره

قاسمی عرفانه چاتب شاد اولوب

حجله سی اندوهیله بر باد اولوب

بیر اوجا بوی قارداشی الدن گئدیب

قارداشنون داغب اونی پیر ائدیب

یاور و انصاری بویاندی قانا

دوشدی سوسئز جسمیلری میدانا

لیک حسین حقدن عدول ائتمدی

بیکس اولوب صلحی قبول ائتمدی

ائتدی اول آلاهنا توکل

ائتدی سورا آتاسنا توسل

دیزلرینه قویدی او مولا الی

دوردی ایاق اوسته ددی یاعلی

ائتدی وداع غصه لی اولدوزلارن

زینبه تاپشوردی حسین قزلارن

زینبون اما اورگی قانیدی

چون کی حسین قارداشی عطشانیدی

لیک حسین ابن علی استوار

مرکز میدانه گئدیب با وقار

تلی اننده اوشه خوش خصال

عقل دیل آچدی ائلسون تا مقال

عقل نه اظهار ائلدی بی حساب

عشق اونا فوری وریبدی جواب

عقل ددی سالما اوتا جانووی

عشق ددی قوی توکوله قانووی

عقل ددی زینبووه فکر ائله

عشق ددی مکتبووه فکر ائله

عقل ددی اکبره طوی دوتمادون

عشق ددی عرشه جخبدی آدون

عقل ددی سازش ائله رهبر اول

عشق ددی بات قانووا دلبر اول

عقل ددی صبر ائله سندی بلون

عشق ددی قوی کسیله تا الون

عقل ددی گئتمه ضرر وار حسین

عشق ددی سنده ظفر وار حسین

عقل ددی قزلارووی ورالار

عشق ددی یزیدی سندرالار

عقل ددی عشقیده یوخ منفعت

عشق ددی عقلیده یوخدی جرات

عقل ددی عمرووی ورمه یله

عشق ددی آلاهی راضی ائله

عرش و جنان شایق اولوبدی سنه

آلاه ئوزی عاشق اولوبدی سنه

آخر الامر اولدی حسین ارزیاب

عقلی آتب عشقی ائدیب انتخاب

عشق حسین عقلیدن ارزنده دی

عقل بشر او عشقیلن زنده دی

لشگریلن اولدی حسین روبرو

تا ائده اولده بیر آز گفتگو

حجتی اتمام ائده دشمنلره

خیری عنایت ائده اهل شره

هر سوزی اعدایه ددی میر عشق

حجتی اتمام ائلدی پیر عشق

ائتمدی تاثیر او جاهیلره

اولمادی کاری سوزی غافیلره

باشلادی آخرده جهاد ائتمگه

سرعتیلن عرصه گهه گئتمگه

حمله ائدیب قهریله ناکسلره

یورش ائدیب گله کرکسلره

خنجری اوت توکدی عدو باشینه

دگدی عدو باشی لحد داشینه

هر دفعه حمله  ائلدی استوار 

مین نفری ائتدی حسین تار و مار

حمله ائدور متین و بی واهمه

یورولجاقین دییردی یا فاطیمه

قدرت یزدانین ائدیب آشکار

نغمه نصرت اوخیور ذوالفقار

میسرییه ضربه ورور یکتنه

فوری قاچور قورخوسونان میمنه

دشمنی قویمور یتیشه ایمنه

یاره ورور یاره گورا دشمنه

اعجاز ائدور عرصه گهده او بافضل

هر قولوندا گورسندی مین ابالفضل

ائله نبرد ایلوردی او دلاور

ائله  بیل کی  یانندا اوغلی اکبر

ائله ائدوردی لشگری تار و مار

ائله داینمشدی حسین استوار

هئچ ائله بیل قلبینی غم بولمیب

هئچ ائله بیل ابالفضلی ئولمیب

تشنه لیگی ورمدی افسوس امان

لبلری عطشان یخلار قهرمان

نیزییه تکیه ائلدی دینجله

خسته اولان جسمه تزه جان گله

یادینه دوشدی او زمان قارداشی

نهر فرات اوسته ئولن قارداشی

یادینه دوشدی یارالی اکبری

یادینه دوشدی صود امر اصغری

یادینه دوشدی هامی انصاریلر

یاره گورا قانه باتان یاریلر

آه چکیب سویلدی یولداشلارم

هارداسوز ای یاره لی قارداشلارم

واردی نیازیم بو زمان چوخ سنه

هارداسان عباس یتیر ال منه

گل نجه گور سینه مه اوت سالمشام

هایانداسان میداندا تک قالمشام

ناگه اودم آلننا دگدی بیر داش

قانی آخب شدتیلن سندی باش

کوینگینی قوزادی مظلوم حسین

آخان قانی تا سیله معصوم حسین

گون کیمی گل سینه سی اولدی عیان

دیزین یره وردی او دم اوخ وران

حرمله تز جفا یولون یوخلادی

شاه شهیدون سینه سین اوخلادی

سه پر اوخی وردی نجه اورگدن

 اورگ سوکولدی چخدی اوخ کورگدن

بیر سوز ددی حسین اودم آی ننه

سینه ام سینون کیمین اولوب وای ننه

حالت عشقیله او شاه حجاز

دیزین یره قویدی خم اولدی  بیر آز

دال طرفه الین آپاردی حسین

ملکلرون قلبینی یاردی حسین

دوتدی اوخی او غملی بی واهیمه

چکدی چوله سویلدی یا فاطیمه

چکدی اوخی نجه او مظلوم آقا

دگدی یوزی اوسته قوری توپراقا

عالم معنایه دوشوب اوخ سوزی

فاطیمه نون اشگیله دولدی گوزی

آچدی باشین سویلدی جان جان بالا

یاره سینم سینووه قربان بالا

یوخ فلکون رحمی بو گوز یاشیمه

قارووی سالدلار حسین باشیمه