فراموش کردم
اعضای انجمن(67)
جستجوی انجمن
ائلبان 68 (sprit )    

یاحشی خوروز

منبع : (آسیا خالقلارینین ناغیل و ا�
درج شده در تاریخ ۹۲/۰۷/۱۳ ساعت 23:54 بازدید کل: 280 بازدید امروز: 121
 
بیری وار ایدی، بیری یوخ ایدی، کئچمیش زامانلاردا ایکی اوزاق قوهوم وار ایدی بونلارین بیری یوخسول ایدی، اؤزو ده مئشه‌ده، بالاجا بیر داخمادا اولوردو او، بیری دؤولتلی ایدی، شهرده، قشنگ، بؤیوک بیر ائوده یاشاییردی

گونلرین بیر گونو یوخسول، مئشه ایله گئدیردی، بیردن آغاجین آلتیندا پاریلدایان  قیزیل بیر للک گؤردو باشینی قالدیریب یوخاری باخدی، گؤردو کی، آغاجدا قویروغو قیزیل بیر خوروز اوتوروب یوخسول قیزیل للگی گؤتوروب بیرباش شهره، دؤولت‌لی قوهومونون یانینا گتیردی
دؤولت‌لی قیزیل لله‌یه باخیب دئدی
– گؤزل شئی‌دیر آنجاق دگری چوخ آزدیر من سنه بو للک اوچون بیرجه مانات گوموش پول وئره رم
یوخسول ایسه عؤمرونده قیزیل گؤرمه میشدی، اونا گؤره ده بیلمیردی کی، بو للک خالص قیزیلدان‌دیر او ائله بیلیردی کی  بو نه ایسه قشنگ پاریلدایان بیر شئی‌دیر اونا گؤره ده او ائله بیلدی کی، اونون قیزیل للگی اوچون گوموش پول یاخشی قیمتدیر.
یوخسول کیشی او بیری گون یئنه ده مئشه‌یه گئتدی، همین آغاجین آلتیندان یئنه ده قیزیل للک تاپدی اونو گؤتوروب دؤولتلی‌نین یانینا آپاردی، یئنه ده عوضینده گوموش پول آلدی بیر نئچه گون دالبادال بو احوالات بئله باش وئردی 
بیر دفعه ده یوخسول همیشه کی کیمی آغاجین آلتینا گلدی، گؤردو کی، قیزیل قویروقلو خوروز برکدن بانلاییر 
– کیم منیم اوره گیمی یئسه، او آدام هر گون بالیشینین آلتیندان ایکی قیزیل یومورتا تاپا‌جاق کیم منیم اوره گیمی یئسه، او هر گون بالیشینین آلتیندان ایکی قیزیل یومورتا تاپا‌جاق
یوخسول بو ایشه لاپ مات قالدی، تئز شهره قاچیب احوالاتی دؤولت‌لی و آجگؤز قوهومونا دانیشدی او ایسه جاوابیندا دئدی
– اگر سن او خوروزو منیم اوچون توتا بیلسن  سنه اونون اوچون مین گوموش پول وئره رم
یوخسول اونونلا بئله شرط کسدی
سنین پولون منه لازیم دگیل یاخشیسی بودور کی، منیم ایکی اوغلومو اؤز یانینا آپاریب اونلارا اؤز اوشاقلارین کیمی باخ من ایسته ییرم کی، اونلار عقل‌لی و ساوادلی اولسون‌لار دؤولتلی او ساعت سؤز وئردی کی، یوخسولون اوشاقلارینی یانینا آپارار و اونلاری اوخوماغا قویار بونون عوضینده ده یوخسول کیشی دؤولتلییه سؤز وئردی کی  قیزیل قویروقلو خوروزو اونون اوچون توتسون
یوخسول سحر تئزدن مئشه‌یه، همین آغاجین آلتینا گلدی قشنگ خوروز دینمه‌دن یوخاریدان اونا باخیردی
یوخسول نشان آلیب اوخلا قیزیل قویروقلو خوروزو ووردو یوخسول کیشی خوروزو گؤتوروب اوغلانلارینا وئردی، اونلاری شهره، دؤولتلی قوهومونون یانینا گؤندردی
دؤولتلی قیزیل قویروقلو خوروزو گؤروب سئوینجیندن آتیلیب دوشدو او، اؤزو خوروزون قیزیل للک‌لرینی بیر بیر یولدو، سونرا اونو یوخسولون اوغلانلارینا وئردی کی، خوروزو بیشیریب ناهارا اونا وئرسینلر او، اؤزلوگونده بئله قرارا گلمیشدی کی، یوخسولون اوغلانلارینی درسه گؤندرمه‌یه‌جک قوی اونون یانیندا قالیب نؤکرچی‌لیک ائله‌سینلر
اوغلانلار مطبخه کئچیب خوروزو بیشیرمگه باشلادیلار اونلار چالیشیردیلار کی، خؤرک دادلی اولسون، دؤولتلی قوهوملاری راضی قالسین آنجاق بختلری گتیرمه‌دی خوروز بیشیب لاپ حاضر اولانا یاخین، اتین سویو بیردن قازاندا پیققاپیق قاینادی، خوروزون اوره گی سیچراییب بیرباش دؤشه مه‌نین اوستونه دوشدو
وای، بو نه بلا‌دیر باشیمیزا گلدی دئیه بؤیوک قارداش دیللندی ایندی گرک خوروزون اوره گینی توللایاقبیر باخ ها  لاپ چیرکلی دؤشه مه‌نین اوستونه دوشوب ایندی اونو گؤتوروب آغامیزا وئره بیلمریک
کیچیک قارداش ایسه یالواردی
خوروزون اوره گینی توللاما من سحردن هئچ بیر شئی یئمه میش یاخشیسی بودور کی، گل اونو گؤتوروب یویاق، اؤزوموز یئیه ک
قارداشلار بئله ده ائله‌دیلر خوروزون اوره گینی یویوب ایکی یئره بؤلدولر، هره بیر پارچاسینی یئدی سونرا دا بیشمیش خوروزو دؤولتلی قوهوملارینین یانینا آپاردیلار
دؤولتلی او ساعت باشلادی بوشقابین ایچینی قوردالاماغا کی، خوروزون اوره گینی تاپسین آختاردی، آختاردی، خوروزون هامیسینی یئدی، آنجاق اوره گی هئچ یئرده تاپمادی اوندا دؤولتلی، اوزونو قارداشلارا توتوب سوروشدو
خوروزون اوره گی هانی؟ اونو نئیله میسینیز؟
قارداشلار بو واخت احوالاتی اولدوغو کیمی اونا دانیشدیلار
 تاماهکار دؤولتلی اونلارین الیندن ائله هیرسلندی کی، آغاجی گؤتوروب اونلارین ایکیسینی ده ائودن قوودو
قارداشلار آغلایا آغلایا مئشه‌یه، اؤز یوخسول، بالاجا کوما‌لارینا قاییتدیلار اونلار هئچ باشا دوشه بیلمیردیلر کی، بیر خوروزون اوره گی نه دیر کی، اونون اوستونده دؤولتلی بو قدر هیرسلنیب اونلاری ائویندن قوودو
گئجه کئچدی، سحر قارداشلار هره‌سی اؤز بالیشینین آلتیندان بیر قیزیل یومورتا تاپدی اونلار قیزیل یومورتا‌لاری دا گؤتوروب آتا‌لارینین یانینا گئتدیلر و باشلارینا گلنی اونا دانیشدیلار
آتاسی اونلارا دئدی
– منیم او دؤولتلی قوهومومدان اوره گیم برک اینجیدی، سیزی ائویندن قوودوغو اوچون من بو پاریلدایان یومورتا‌لاری هر کس اولسا ساتارام، تکجه اونا یوخ
ائله بو واخت یاخینلیقدان گزرگی بیر تاجر کئچیردی یوخسول کیشی یومورتا‌لاری گؤتوروب اونون یانینا گئتدی تاجر دئدی
آ، بو یومورتا‌لار کی، خالص قیزیلدیر من بو قیزیل یومورتا‌لارا گؤره سنه یاخشی پول وئره رم
تاجر بونو دئییب یوخسولون اتگینه او قدر پول تؤکدو کی، او، هئچ عؤمرونده بو قدر پول گؤرمهمیشدی
یوخسول کیشی آنجاق ایندی باشا دوشدو کی، دؤولتلی قوهومو اونو همیشه آلدادیرمیش، قیزیل للک اوچون اونا گوموش پول وئریردی عیبی یوخدور دئیه یوخسول اؤز اؤزونه دوشوندو
 بیزلرده بیر مثل وار  دئیه رلر کی، باشقاسینی آلدا‌دان اؤزو ده آلدانار ائله بئله ده اولدو
 او گوندن بری قارداشلار هر گون اؤز بالیشلارینین آلتیندان هره‌سی بیر دنه قیزیل یومورتا تاپیردیلار آتاسی بو قیزیل یومورتا‌لاری یاخشی قیمته ساتیردی اونلار ایندی لاپ یاخشی دولانیردیلار آنجاق ان باشلیجاسی او ایدی کی، قارداشلار اؤز آرزولارینا چاتمیشدیلار ایندی اونلارین ایکیسی ده علم اؤیرنیردی و خیلی شئی ده اؤیرنه بیلمیشدیلر 

(آسیا خالقلاری‌نین ناغیل و افسانه‌لری کیتابیندان)- آراز آذربایجان
این مطلب توسط نویدصالحی بررسی شده است. تاریخ تایید: ۹۲/۰۷/۱۳ - ۲۳:۵۵
اشتراک گذاری: تلگرام فیسبوک تویتر
برچسب ها:

1
1


لوگین شوید تا بتوانید نظر درج کنید. اگر ثبت نام نکرده اید. ثبت نام کنید تا بتوانید لوگین شوید و علاوه بر آن شما نیز بتوانید مطالب خودتان را در سایت قرار دهید.
فراموش کردم
تبلیغات
کاربران آنلاین (0)