گؤزون آیدین آذریایجان (اوزل موخاطبیم ائلی بئیه)

بیری دئییر اوروس یاخشیدیر

بیری دئییر فارس،آذری لرین دوشونن باشیدیر

چوبان ماحمود دا دئییر

هر شئیدن باشیمدا کی بؤرک یاخشیدیر

بؤرک یعنی پاپاخ

به به! میللته باخ...

بیر آذربایجان اولاق دییه ن یوخدی

دیله نن چوخدی

أکیپ، بئجه ریب، یییه ن یوخدی

گؤزلری بیرینین مالیندا دیر،اوبیرین دالیندا دیر

کیمی مینیلمک اوچون داریخمیش آت کیمیدیر

کیمی آیاغی سوروشکن، نیسه.........

یاخشی کی بو میللتین گؤزونون ایشیغی،آزادلیق عاشیقی پلنگ ،شیر بالالاری وار

والله یوخسا بو میللت یاشیا بیلمزدی

روسیه کیمین اؤلوم ملگینی بوشیا بیلمزدی

اوروس قونشوموزدور

یاخشی قونشی سئوینج یولداشیدی

غم قارداشیدی

آتالار دئییب یاخین قونشی اوزاق قوهومدان یاخشیدی

آمما بئله بیر مثل ده واردا

قونشی ایشیغینا اومود اولان قارانلیق دا قالار

قونشون اولسون،اؤزونونده باشین اولسون

مصلحت یئرین دوغما قارداشین اولسون

قالین چپرین،سنی قورویان قوشون اولسون

بیر ألینده آشین اولاندا بیر ألینده ده داشین اولسون

اونوتقان اولما، یادداشین اولسون

اینانماق یاخشی شئی دی

آییق لیق یول یولداشین اولسون

آزادلیق چؤرک دئییل

آمما چؤرک دن اوّلدی

آزادلیق چؤرگی قازانان ألدی

یوخسا سنه چؤرک وئرن أللر

کورگینه قیرماج لار چکجکلر

سن أکیب بئجرتمه سن

سئنین باشیندا تورپ أکجک لر

 بیر میللت وار بیرده ملت سؤزون ایچینده علت سؤزو وار

میللتین یاخشیلاری چوخ اولاندا میللت اولور

میلبت اولاندا دولت اولور

اوندا کیم ایسده سه اؤزونه رهبر سئچه بیلر

یاخشیلاری چوخ اولاندا رهبر رمزی اولور

وطن داشلاری نین اوتوله نن قدی اولور

قوناق لارینین قوناق حدی اولور

یاخشیلاری قیریلاندا

وطن داشلاری، باشی چالمالی قیرمیزی مزار داشلارینا دؤننده

یاخشیلار باشی داشلی لارا گؤزی یاشلی لارا دؤننده

میللتین عیلتی قالیر

عیلتی چیخیر اوزه

گؤزی هر ایش آرتی یا قاچیر

سوخولور هر یاندا گؤزه

2 ألی وار 4 یاندان أل آچیر

اوز وطنینده اوزونی اسیر ساییر

بالاسینی یئسیر ساییر

آزادلیق سؤزونی أن قورخولی سیّر ساییر

امام حسین مصیبتین ده بوگون اوزونو مقصیر ساییر

گناهی باغیشلان سین دیه آغلی ییر

آغاجینا، باشینا، داشلا قارا باغلی ییر

بس قاراباغدان دی درگین دوشن گلین لره،کؤرپه لره کیم آغلیاجاق؟!

ارمنی آیاق آلتیندا قالان مقدس یئرلره کیم آغلیاجاق؟!

مللت لر آغلاسین گرک بیزیم دردیمیزه

فاطمه زهرا بو گونوموزی گؤرسئی دی

بالالارینی اونودوب دردیمیزه سینه دؤیئردی

تورکلر

گؤزونوزده یاش قالیب سا اؤز حالینیزا آغلی یین دی یئردی

دنیا یارانان دان ساواشدیق

ایندی ده ساواشیریق

کیمی یارالاندی

کیمی ده عومری بویی ساواشدی

آدمی جنت دن قووموشلار

آمما هم وطن لریمیزین بعضی سی جنت دن اؤزی قاشدی

کئچمیشده قاچاق اولاردی کیشی لر

قاچاق،مرد اولاردی قوچاق اولاردی

سسی دشمن کورگینه پیچاق اولاردی

دشمن ده هارا آیاغینی باسدی اؤلردی

مئشه نین هر آغاجیندان دشمن قورخاردی

ائویندن قاچان مئشه سینه چکیلردی

بولاق اولوب تورپاغینا آخاردی

آغاج اولوب قایاسینا أکیلردی

ایندی کیلرین بعضی سی باکیدا یئددینجی مرتبه ده قاچاقدی

کئفی کؤکدی، داماغی چاقدی

اؤزوده گؤزلی ییر کی ارمنی اونون ناموسونی تمیزلی ییب قایتاراجاقدی

BMT نین وئردی یی وعده نی ساققیز کیمی چئینی ییر چیرت آتیر

هومانیتار یاردیمینان گئلن ساققیزی بازاردا ساتیر

ساتماغا اؤیرش میشیک

کیمی وطن ساتیر! کیمی ساققیز! کیمی ده قارپیز...

خلوت ده رادیودا باکینی توتموش دی

ارمنی ألینده اسیر اولان قیز

کیمسه رادیودا

بیز 40 میلیونلوق خالقیق دی ییب باغیردی

قیزین بدنینده دشمن ألی دئین هر یئری آغریدی

باشینا باشینا دؤیوب آغلادی

قارداش من یادلاردان قورخ مورام

ایچیمده کی یاد سسدی منی قورخودان

بورداکی روس پرست دی، اورداکی فارس پرست دی منی قورخودان

ایندی شکر الله اؤز ألیم اؤز باشیم هامی منیم باجیم قارداشیم

چوخی پرزیدنت اولماق ایستی ییر

چوخی ناظیر اولماق ایستی ییر

باش ناظیر،اورک ناظیر،گؤبک ناظیر

یازیق فحله،کئندچی،معللیم،عالیم

منیم جفا کش اوبام ائلیم

ائو تیکیر تاخیل بیچیر اوشاق أکیر

آج قارینا وطن غیرتی چئکیر

لازیم اولاندادا دؤیوشن بونلاردی

شهید دوشئن علیل اولان دا بونلار دی

بیزی پارچالی ییبلار

آرامیزدا آراز آدلی سو جالی ییبلار

اوردا آزادلیق دی ین اوغول لاریم آسیلیر

اوردا دانیشان دیل لره داغ باسیلیر

منیم اسارتیمدن گئدیر زامان

اوردا بؤیوک آذربایجانین تاریخی یازیلیر

شاعیر وصفینی یاز،رسّام رسمینی چئک

سرحد دیره ک لری یانیندا بیر چینار أک

سرحد چیم سئوگیی نن ظفر چالاق

هامی آغ اوزونن گئلسین او گؤزل گونه

باخ اوندا،گؤزلر آغلایاندا اورک لر گولجک

قارداشیم هی...  دئسه م

میلیونلار سئس اوجالاجاق

جان جان جان

باخ اوندا دی یرم

گؤزون آیدین آذریایجان

گؤزون آیدین آذریایجان