بیر کوچه یدی ...

بیر کوچه یدی ، بیر پئجره ، بیرده سن
اؤتوشردیم کوچه نیزدن هر گئجه
بیر آی کیمی بزنمیش دین باخاردین
هئچ بیلمزدین وورولموشام من نئجه ...

بیر کوچه یدی ، بیر گئجه یدی ، بیرده من
یالنیز یالنیز اؤتوشردیم او یئردن
گؤرمه ینده تکجه سنی بیر گئجه
اود توتاردیم ، آلیشاردیم یئریمدن

بیر کوچه یدی ، بیر اوزون یول ، بیرده من
آددیملاردیم رؤیالاری سنینله
هر چیراغی تونقال سانیب تویومدا
رقص ائدردین قاپی قاپی منیم له

بیر کوچه یدی ، بیر پنجره ، بیرده من
ساعاتلار فیرلاندی آنجاق گلمه دین
آغلادیمدا باغیردیمدا سئوگیلیم
بیرجه منیم گؤز یاشیمی سیلمه دین

بیر کوچه یدی خوشبخت اولدو بی گلین
کؤچوردولر سئوگیلیمی او گئجه
گلین اولموش ، سئوینیردی او دورنا
بیلمه ییردی آلیشیرام من نئجه

بیر گئجه یدی ، بیر کوچه یدی ، بیرده من
قار یاغیردی آدیملارین اوستونه
اؤتوشوردو اوره ییمدن فصیللر
تانری دورموش طالعیمین قصدینه

بیر کوچه یدی ، بیر کوچه یدی ، بیر کوچه ...

بابک قوجازاده