یار یارا تن گلنده

بیری واریمیش، بیری یوخ ایمیش، بیر- بیرینه تای اولان ار- آرواد واریمیش. بونلار آواملـیقدا، ساده‌لؤوح‌لیکده بیر- بیریندن گئری قالان دئـییلدیلر. آنجاق بیری‌نین گؤردویو ایش او بیریسی‌نین خوشونا گلدییینه گؤره همیشه بیر- بیرلرینه مهربان‌ ایدیلر.

بیر گون بئله اولور کی، باشقا شئـی‌لر آلماق اوچون پَیه‌ده‌کی اینه‌یی ساتمالـی اولورلار. کیشی اینه‌یین بوینونا چاتـی‌نـی سالـیر، سورور بازارا. گؤرور کی، بازاردا کئچی ساتـیرلار، کئچی خوشونا گلیر. اینه‌یی کئچی ایله باش- باشا دییشیر. کئچی‌نی قاتـیر قاباغـینا سورور تویوق- جوجه ساتـیلان یئره. اورادا بیر پیپیی قـیرمیزی خوروز گؤرور، چوخ خوشونا گلیر. کئچی‎نی وئریب خوروزو آلـیر، دوشور یولا. هارادا بیر شئـی خوشونا گلیر الینده‌کینی وئریب اونو آلـیر. ائله بو جور آلـیش- وئریش ائده- ائده ائوه بیر توربا تورش آلچا ایله قایـیدیر.

آرواد کیشی‌نین گلدییی‌نی دویان کیمی سئوینه- سئوینه کیشی‌نی قارشی‌لایـیر. کیشی‌نین چینینده‌کی توربانـی یئره قویماقدا اونا کؤمک ائله‌ییر. توربانـی یئره قویا- قویا دئـییر: - هه، کیشی دیء گؤره‌ک نه‌یی ساتـیب، نه‌یی آلدین، نه قده‌ر قالدی؟ کیشی چکینه- چکینه دئـییر: - آرواد بیلیرسن نه وار؟ بازارا تزه‌جه گیرمیشدیم کی، گؤردوم یاخشی بوینوزلو بیر کئچی ساتـیرلار، خوشوما گلدی اینه‌ییله باش- باشا دییشدیم. آرواد دئـییر: - نه اولار، کئچی یاخشی حئـیوان‌دیر. لاپ یاخشی ائله‌ییب‌سن. کیشی دئـییر: - هله بیر دایان، بو هاراسی‌دیر.‌ تویوق- جوجه ساتان یئرین یانـیندان کئچنده بیر مخمل توکلو خوروز گؤردوم، خوروز نه خوروز! کئچی‌نی وئریب خوروزو آلدیم. - خوروز لاپ یاخشی، نه عجب سنین یادینا دوشوب بیزیم تویوق‌لارا ائله بیر دنه خوروز لازیم ایدی، ساغ اول کیشی! کیشی دئـییر: - هله بو هاراسی‌دیر، بیر دایان. تاخـیل ساتـیلان یئردن کئچنده آرپا گؤردوم. خوروزو وئریب آرپا آلدیم. آرواد یئنه سئوینیر: - کیشی، یاخشی ائله‌میسن، عجب ائله‌میسن. بو بویدا حیطیمیز بوش- بوشونا قالـیب. آرپانـی سپیب عوضینه نه قده‌ر تاخـیل بیچه‌ریک. اؤزوموز ده اون ائله‌ییب، بیشیریب یئـیه‌ریک. تویوق- جوجه‌یه ده وئره‌ریک. کیشی دئـییر: - آرواد هله دایان، آرپانـی دا بیر توربا تورش آلچا ایله دییشدیم. بودور گتیرمیشم.

آرواد سئوینج‌له دئـییر: - نئجه، تورش آلچا؟ من نه واخت‌داندی یئریک‌له‌ییرم تورش آلچایا. سن نه آغـیل‌لـی کیشی ایمیش‌سن. منیم اوره‌ییمدن کئچه‌نی نئجه یاخشی بیلیب‌سن. آی سنین قادانی آلـیم، آی سنین باشینا دولانـیم. آرواد سئوینجیندن قول‌لارینـی اری‌نین بوینونا سالـیب اونون اوزوندن- گؤزوندن اؤپور. کیشی ده راضی قالـیر کی، ائله‌دییی بازارلـیق آروادی‌نـین خوشونا گلیب. حال‌بو کی، بازاردان تورش آلچا ایله قایـیداندا قورخوردو کی، آرواد اونو او کی، وار دانلایار. آرواد اریله کؤمک‌لشیب تورش آلچا تورباسینـی ان قییمتلی بیر نئعمت کیمی ائوه آپاریر. دوز دئـییرلر کی، یار یارا تن گلنده سؤزلری ده، ائله‌دیکلری ده ایش‌لری ده بیر- بیرینه خوش گلیر و اؤزلرینی دونیانـین خوش‌بخت آدام‌لاری حئساب ائدیرلر