بایرامیدی گئجه قوشو اوخوردو

"باییامیدی گئجه قوشو اوخویدو

آداخلی قیز بی جویابین توخویودو

هر کس..."

 شیرین سسین اییه سینی تاپماقدان اؤترو گؤزلریمی توکانین هر یئرینه دولاندیردیم.بیردن گؤزوم بیر بالاجا قیزا دوشدو،شعری یاواش_یاواش دیل دوداغینین آلتیندا اوخویوردو.من بیر ایکی آددیم اونلارا ساری گئتدیم،یاخینلاشدیغیمی حیس ائدینجه اؤزونو آناسینین دالیسیندا گیزلتدی.

_بالاجا خانیم اولار شعریوی بیرده اوخویاسان؟نه قشنگ اوخویوردون!

هئچ دینمه دن قارا گؤزلرینی اوزومه زیلله میشدی و اؤزون بیرآزدا گیزلتدی.

_آدین نمنه دی؟

آناسی دئدی مارال دی، کیچیییزدی.

_ آلله ساخلاسین.

_ ساغ اولون.

اوشاغی داها راحاتسیز ائتمه دن اؤترو،اونلاردان اوزاقلاشدیم،آمما تام دیقتیم اونلاردا ایدی.

اوست باشلاریندان بللی دی، اوشاقلارخانیمی زورونان چکیب  گتیریبلر بورا !

توکان باسا _باسی دی ،خانیم هئی اویان بویان ائدیردی بلکه توکان بیرآز بوشالا ائله کی ساتیجینین باشی بیرآز خلوتله شدی،خانیم یاواشجا اَییلیب دئدی:قارداش بو اوشاقلارین اینینه پالتار نمنه واریز؟

الینن ایکی اکیز اوغلانلاری و مارالا اشاره ائله دی.

ساتیجی اوشاقلارین اوست باشینا آلتدان یوخاری باخیب، دئدی:خانیم اوغلانلاریز اوچون بو راحتی سئتلر وار بیرینجی جینس دیر،اللی مین ،بوندان آشاغی مارکدا وار اوتوزا چیخیر،البت یوخاری مارکلاردا وار،قیز پالتارلارینا دا اویاندا باخا بیلرسینیز ،اللی میندن توتون گئدین یوخارییا

_: قارداش بونلاردان آشاغی بیر شئی یوخ؟گوجوم چاتماز،اوچونه ده آلام!اوجوزلو اولسون.

_ :بونلار لاپ آشاغی قیمتلریمیزدی ،اوبیری توکانلارا گؤره چوخ آشاغی وئریریک ،گئدیب سوروشادا بیلرسینیز.

_ :باخین گؤرون پالتارلاریزین ایچینده،بلکه زده لی سی اولدو بوندان اوجوز وئردیز گؤتوردوم ،بایراملیقلارینا!!

_ :خانیم فیکر ائله میرم آمما اولسون،باخارام اولسا قویارام قیراغا ،آخیر واخت گلیب آپارارسینیز.

آرواد ساغوللاشیب ،اوشاقلارینین الیندن یاپیشیب توکاندان چیخدیلار.....