آلاقاپی - بویجوق (داستان کوتاه)

قاپیمیزین قاباغی قاردان هؤرولموشدو.الیمی جفته‌یه آتاندا آز قالدی دمیره یاپیشا. تئز الجک‌لریمی گئیدیم. یئنه ده هر گونکو کیمی ائودن چیخیب ایشه ساری گئدیردیم. قونشوموز عاریف، کوچه‌یه چیخیب ماشینینی قیزدیریردی. سالاملاشدیق.

دئدیم: قیشین ایلک گونلرینین شاختاسی  دیر بو ،هه، اردبیل اؤزونو گؤرسه دیر.

عاریف دئدی: ائله آذر آیینداندن بویانا شاختا دوشوب. قار هر یئری قارمالاییر. نئیله مک بیزیم ده پاییمیز بودور دا.سونرا گولومسوندو

عاریف دن آیریلیب آلاقاپی یا ساری یولا دوشدوم.

اؤزومه دئدیم:هامی دئییر بؤیوک چیلله ده ییک. هله هاراسی دیر. کیچیک چیلله “حیییف عؤمروم آز دیر قاباغیم یاز دیر ” دئیه –دئیه قاباق دادیر اؤزو ده گؤزونو قیرپانا کیکی گلیب یئتیشیب.مالاهادی1 دان دؤندوم آلاقاپی2 یا ساری. زیبیل چی مشه اوروج اره به سینی  یاواش –یاواش سوروردو.بوغو قیرو باغلامیشدی.

دئدیم :یورولما مشه اوروج.

دئدی: آی ساغ اول ارباب بو قار یامان کیریخدیریب منی ملاهادی یئرینه سلیمانشاها3 گئدیردیم بیر ده دؤنوب قاییتمیشام.

دئدیم :اولسون یاخشی هله شاه باغیندا4 آییلماییبسان.

هاهاها…گولوب دئدی:هه والله دوز دئییرسن ،گئت الله ایشینی راس گتیرسین.

ساغول دئییب یولا دوشوب میدانا یئتیشدیم. ائله مئیداندا یئتیشن کیمی توحید دوستومو گؤردوم.

آی بالا سن هارا بورا هارا :دئدیم.

دئدی: سوروشما گلمیشم توکان اوچون شئیدگاهدان5، پیچین بوروسوندان6 آلام هله سینکه چی توکانین آچماییب.

دئدیم: داریخما ایندی آچار .هله سن میدانا باخ گؤر نه قالابالیق دیر.

دئدی: بو آلا قاپی میدانیندا ائله هر گون بو فحله لر جومالاشیرلار. قیشدیر،قار یاغیب زاد بیلمیر لر.

دئدیم:هه، ائله بیل میتینگ دیر

دئدی :ائله میتینگ دیر، من لاپ بایداقلارینی7 دا گؤرورم .

یازیب:ایش ایشله دن تاپیب تئز ایشه باشلاماق-  یاشاماقدیر یاشاماقدیر یاشاماق “.دئدیم:ائله لاپ شاعیر اولوبسان ها

دئدی:اؤزوم ده بیلمه دیم نه تهر اولدو ائله قافیه راس گلدی

دئدیم:هه ،قدیم کی فحله لر میتینگ نه دیر بیلیردیلر ،آما آلتمیش ایل بوندان قاباق دان بویانا بو سؤز دیللردن کؤچوب بئله یادلاردان دا سیلینیب. بیر دؤنه اوستو اؤرتولو بازاردا بیر درزی دن سوروشدوم میتینگ گؤرموسن ؟ دئدی وای-وای بو سؤزدن “قان ایسی گلیر”….

ایکیمیز ده گولدوک.

سینکه چی توکانینی  آچمیشدی توحید مندن آیریلیب گئتدی.منده گئدیب تاکسی یا دوروب میدانا باخماغا باشلادیم .هرفحله نین قاباغیندا بیر ریزین دولو، بیر تئشه ،بیرده کولونگ وارایدی. ایسینمک دن اؤته ری ده هره سی بیر تونقال قویوب اود قالامیشدیلار .نئچه لری بیر یئشیک یا اونا بنزه ر بیر شئی لر تاپیب اوستونده اوتور موشدولار نئچه لری ده یئیین آددیم لارلا سولا طرف گئدیب اوشویندن سونرا، دؤنوب اللرینی پئنجکلرینین8  جیبینه  قویوب، سویو سوزوله نه –سوزوله نه، ساغ طرفده کی تونقالا ساری قاییدیردیلار. فحله لرین سور- سوفه تی اونلارین چوخونون کند لی اولدوقلارینی گؤرسه دیر دی. فحله لرین بیریسی بویلو – بوخونلو بیر گنج ایدی اؤزوده  الینده بیر تئشه. لاپ ائله بیل فرهاد ین اؤزو اوردا دورموشدو .

بیردن- بیره بیر پیکان ماشینی ساخلادی. اوندا ائله بیر قاچا- قاچ دوشدو گل گؤره سن . والله آیاق آلتیندا قالماق قورخوسو دا وارایدی ائله .

پیکان شوفئری قیشقیردی آی بالا تک بیرینی ایسته ییرم اما پیکان ماشینینین آرخاسینا دؤردو  و قاباغا دا ایکیسی تپیلیب هئچ بیری ده دوشمه گه گؤیولالف11 وئرمیردیلر. بایاقدان آلاقاپی میدانینین سکی لرینده بیر بیری لری ایله دئیب – گولن آداملار ایندیسی بیر بیری لری ایله بوغوشوردولار.

بیرینجی ماشینا مینن آدام اوبیریسی لرینه دئدی: ایلک من مینمیشم .سیز انمه لی سیز.

اوبیریسی ده دئدی: ایندی سن ایلک ماشینا مینیب سن گل باشیمیزی یار. به  بیز ایشه گئده بیلمه ریک .

قاباقدا اوتوران بیر آریق فحله دئدی آی آغا گل سنم9  بیزیم هامیمیزی ایشه آپاراسان.

ماشین یئیه سی قیشقیردی آی باشووا جا دؤنوم من تک بیر نفر ایسته ییرم.

بیر توزاناق قالخدی . سونرا ماشینی ، ایچینده ایکی کیشی اولاراق، گئدن ده گؤردوم.

یئرده قالان فحله لر او پیکانین آرخاسیجا باخا –باخا قالدیلار . ائله اوندا بیر کولک قالخیب گؤیدن یاغان قاری دولاشدیریب منیم یئددی قاتیمدان کئچدی .اوشودوم . دیشلریم بیر بیرینه ده یدی….آمما بیلمیرم نه دن اوره ییم آغریدی…….

کولک فیر لانیب تونقالا یئتیشیب اوتو اؤزویله گؤیه ساری قالخیزدی10……..

دؤنوب آلوولانان اودونا باخدیم ……………………

سعیدفیوضات6/10/91- 8 /9/921 تزه دن یازیلمیش

____________________________

1-  مالاهادی: اردبیلین اسکی کوچه لریندن

2-  آلاقاپی:2اردبیلین ان اسکی محله لریندن شاه اسماعیل ختایی نین قبیری اوردا دیر

3-  سلیمانشاه:آلاقاپی یا یاخین مچید و محله .ائله بیل سلیمان صفوی اورانی تیکدیریب

4-  شاه باغی: اردبیلین اسکی کوچه لریندن

5-  شئیدگاهدان: اردبیلین اسکی کوچه لریندن،چالدیران ساواشینین شهیدلری نین مزاری

6-  بیزیم ائوده لوله یه ،بورو دئیر لر.سینکه چی لرده بورو تانی یاردیلار.

7-  اردبیلده بایراغا ،بایداق دا دئییلیر

8-  پالتو،کوت

9-  اردبیلده گل سنه یئرینه گل سنم ده دئییلیر

10- قالدیردی

11- الف:کونول دئمک دیر.اردبیلده دئییلیر.