مشروطه نین خبرلری(میرزه علی اکبر صابر دن)

  وقتا که مشروطه خبری ایران کندچی لری نین قولاغینا یئتیشدی، بیر نفر قوجا  اکینچی،اکینین ایچینده سجده یه ییخیلیب دئدی:

  صد شکر کی اولدی نورباران                              مشروطه ایله بو خاک ایران

  رخنه یئتیشیب بنای ظلمه                                یئر قالمادی کدخدای ظلمه

  ظلمون، ستمین چیراغی سوندو                        ایران گینه بیر بهشته دوندو

  حاکم لرین اختیاری بیتدی                                 دهقانلارین اضطراری بیتدی

  بوندان سورا رنجبر دویولمز                                 ناحق یئره بینوا سویولمز

  سالماز بیزی ملکدار رنجه                                  قورماز بیزه بیر داها شکنجه

  یازیق بو شعرلری اوخور- اوخوماز ناگاه دیوان مامورلاریندان بیر نفر فرّاش حاضر اولوب اکینچی-نین اهل-عیالی نین گؤزو اؤنونده، قوللارینی باغلاییب، آت قاباغیندا یالین آیاق ایله، اونو اربابین قاپیسینا گتیردی. ارباب گوزلری قیزارمیش، الینده بیر تعلیمی دیشره چیخیب اکینچی نی گوردوکده:

  ها... کتچی، بیر آی کئچیر کی، خرمن                      اوتدو، نره لرده قالمیسان سن؟

  محصولی بوتون اوزون گوتوردون                               اربابه نه پیش کش گتیردون؟!

  بوستاندا کی میوه جاتی دردین                               آیا دئ گورک بیزه نه وئردین؟!

  نه بوغدا، نه آرپا چاتدی سندن                                نه لوبیا- نخود،نه پاخلا- ارزن؟!

  لازیم سنه ایندی مین عقوبت                                 تا عبرت آلا بوتون رعیّت

  بیچاره اکینچی بوینو چیگنینده تمام بدنی اسه- اسه، قورخا- قورخا باش ائندیریب عرض ائتدی:

  آللاها قسم کی، من فقیرم                کوچ کولفت الینده دستگیرم

  اطفال صغیره پاسبانم                        آوارۀ اکل و شُرب و نانم

  معلوم جنابینیز دیر ارباب                     بو ایل قوراق اولدو تاپمادیق آب

  اکدیکلریمین تمامی یاندی                  فریادلریم گویه دایاندی

  واللاه اوزوموز ده قالمیشیق آج            بیر پارچا قورو لواشه محتاج ...

  ارباب کندچی دن بو سوزلری  ائشیدینجه آغزی کوپورموش، گوزلری حدقه دن چیخمیش بیر حالتده: اوشاقلار ! فلقه ، چوبرق حاضر ائدین! اود یاندیرین، شیش قیزدیرین دئدی !  بو اثناده دؤرد نفر ظالم اللرینده شاللاق بیچاره کندچی نین آیاقلارینی محکم باغلاییب، فلقّه یه سالیب دؤیمگه باشلادیلار:

ارباب: وور، وور، کی، گتیرمه ییب دیر آرپا

اکینچی: انسان دوزه مز بو شارپا- شارپا!

ارباب: وور، وور، کی، بیر آز دا مست کامم

اکینچی: جانیم چیخار، وورما، بی دوامم!

ارباب: وور، وور، کی، نه یاغ وئریب، نه قایماق

اکینچی: وورما،کی، دئییل اینک لریم ساق !

ارباب: وور، وور، کی، بونو قودورتدو مجلس

اکینچی: وورما، منی حاکم ائتدی مفلس!

ارباب: مشروطه بونو خراب ائدیبدیر

اکینچی: ظلمون منی دلکباب ائدیبدیر!

ارباب: حریت ائدیب بو قومی گمراه

اکینچی: فریاده یئتیش، آماندیر آللاه!